Австралийн зүүн өмнөд этгээдийн Мельбурн хотын нийтийн орон сууцны хороололд өчигдөр эмэгтэй хүн барьцаалсан хэрэг гарчээ.

Хэргийн улмаас тухайн хорооллын орчимд гэмт хэрэгтэн болон цагдаагийн ажилтнуудын хооронд ширүүн буудалцаан болсны эцэст барьцаалагч этгээдийг устгажээ. Гэвч өөр нэгэн барилгаас нэг эрэгтэй хүний цогцос олдсон байна. Буудалцааны үеэр гурван цагдаа шархаджээ. Харин барьцаанд байсан бүсгүй ямар нэг гэмтэл бэртэлгүй суллагдсан байна.

Одоогоор хууль хяналтынхан тус хэрэгт хэт даврагч бүлэглэлийн оролцоо байгаа эсэхийг шалгаж байгаа юм байна.

Тэгвэл үүнээс хэдхэн цагийн дараа “Лалын улс” бүлэглэл мэдэгдэл хийж, хүн барьцаалсан этгээд тус бүлэглэлийн дайчин байсныг зарлажээ.