Маргааш Олон улсын хүүхдийн эрхийг хамгаалах өдөр. Тэр ч үүднээс хүүхдийн энэрэнгүй, цав цагаахан, бас хайр татам сэтгэлийг харуулсан зургийг “Дэлхийн шилдэг гэрэл зураг” булангаараа хүргэж байна. Энэ зургийг Румыны гэрэл зурагчин Алекс Андрейси Францын Гренобльд авсан бөгөөд дэлхийн шилдэг гэрэл зураг шалгаруулах “Сони фото авардс” наадмын нээлттэй тэмцээнд тэргүүн байр эзэлсэн юм.

Зурагчин энэ зургаар дамжуулан хүүхдийн цагаан цайлган хир буртаггүй нинжин сэтгэл, цаас мэт хөнгөн хэврэгхэн байдлыг харуулахыг зорьж, зохиомжилжээ. Алекс румын хүн. Гэхдээ зургаа францад авах болсон нь ч учиртай. Тэрбээр Румынд төрсөн ч, хүүхэд насандаа Франц руу нүүж байсан аж. Харин тэнд өөрийн хүсэл сонирхол тэмүүллээр зураг авч эхэлсэн бөгөөд 16 насандаа Парист очиж, эрэл хайгуул хийсний эцэст гэрэл зурагчин болсон байна.

“Сони фото авардс” дэлхийн хамгийн том гэрэл зургийн тэмцээн юм. Энэ жилийн тухайд нийтдээ 66 орны гэрэл зурагчид 105 мянган бүтээлээ ирүүлснээс энэ зураг шүүгчдээс хамгийн өндөр үнэлэлт авч, тэргүүн байр эзэлсэн юм. Дашрамд сонирхуулахад, эл зураг тэмцээний дараа “Санаа хулгайлсан” гэх шүүмжлэлд өртсөн байдаг. Оросын гэрэл зурагчин Анка Зуравлева тэмцээний дараа мэдэгдэл хийж, Алекс Андрейси түүний санааг хулгайлан бүтээлдээ ашигласан хэмээн гомдол гаргасан удаатай. Учир нь Анка яг энэ зурагт дүрслэгдсэн шиг зохиомжтой зургийг 2011 онд авч байжээ