Мафийн бүлэглэл сэтгүүлчийн аминд хүрлээ
Мексикийн баруун хойд этгээдэд олон жилийн турш үйл ажиллагаа явуулж буй хар тамхины бүлэглэлийн тухай сурвалжлага бэлтгэсэн алдартай сэтгүүлч Жавьер Валдез амь үрэгджээ.
Тэрээр сүүлийн 10 гаруй жил олны анхаарал татсан сэдвээр эрэн сурвалжлах бүтээл хийж, “Франц пресс” агентлагт нийлүүлдэг байжээ. Талийгаач Мексикийн Синалоа мужийн нийслэл Кулиакан хотын иргэн бөгөөд тэндээ долоо хоног тутмын мэдээллийн сэтгүүл эрхлэн гаргадаг байсан байна. Гэвч, энэ сарын 15-нд сэтгүүлийн редакцийнхаа өмнө буудуулан амь үрэгджээ.
Албаны эх сурвалжийн мэдээлснээр хар тамхины наймаа, хүчирхийлэл, авлига хээл хахуульд нэрвэгдсэн Мексикт энэ он гарсаар дөрвөн сэтгүүлч гэмт бүлэглэлийн гарт амиа алджээ. Харин Жавьер Валдез тав дахь нь болж байгаа юм. Тэрээр амь сэрүүн ахуйдаа “Сэтгүүлч байна гэдэг гэмт бүлэглэлийн хар жагсаалтад орохтой адил юм” гэж хэлж байжээ.
Францын нийслэл Парист төвтэй “Хил хязгааргүй сэтгүүлчид” олон улсын байгууллагын мэдээллээр, Мексикт 2000 оноос хойш 102 сэтгүүлч алагдсан бол өнгөрсөн жил мөн 11 сэтгүүлч гэмтэж бэртэн, амь насаараа хохирсон тохиолдол гарчээ. Энэ нь иргэний дайн үргэлжилж буй Сири, Афганистаны дараа орох үзүүлэлт юм.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
