Ираны зүүн хойд хэсгийн Хорасан мужид өнгөрөгч бямба гарагт 5.7 магнитудын хүчтэй газар хөдөлжээ. Байгалийн энэхүү гамшигт үзэгдлийн улмаас хоёр хүн нас барж, хэдэн зуун хүн гэмтэж бэртсэн тухай орон нутгийн эх сурвалжууд мэдээлсэн байна.

Хохирлын хэмжээ цаашид ч нэмэгдэж болзошгүй аж. Газар хөдлөлт Гринвичийн цагаар бямба гарагийн орой 18:00 цагийн үед тус мужийн Божнурд гэх хотод болжээ. “ISNA” агентлагийн мэдээлснээр газар хөдлөлтийн үеэр 54 настай нэг эмэгтэй болон өсвөр насны нэг охин нас барж, 370 гаруй хүн шархадсанаас гадна байшин барилгынх нь 40 орчим хувь нурж сүйджээ.

АНУ-ын Геологийн судалгааны хүрээлэнгээс мэдээлснээр газар хөдлөлтийн голомт Турзменстаны хилээс 50 км зайд, гүн нь 12.5 км байжээ. Иранд өнгөрсөн сарын 5-нд ч гэсэн Машхад хотын ойролцоо 6.1 магнитудын хүчтэй газар хөдөлж байсан юм.