Нийслэлийн цагдаагийн газрын Халаасны хулгайн гэмт хэрэгтэй тэмцэх хэлтсийн алба хаагчид шуурхай ажилласны үр дүнд бусдад их хэмжээний хохирол учруулсан  хулгайн гэмт хэргийн сэжигтнүүдийг баривчилжээ. Тодруулбал, иргэн А, Т, Х нарын найман этгээд  бүлэглэн их хэмжээний мөнгө хулгайлсан байсан гэнэ.

Энэ талаар НЦГХ-ийн ахлах төлөөлөгч, цагдаагийн хошууч Д.Батзаяа “Манай Халаасны хулгайн гэмт хэрэгтэй тэмцэх хэлтсийн алба хаагчид хулгайн бүлэг гэмт хэрэгтнүүдийг илрүүлж, баривчиллаа. Иргэн А-гаар ахлуулсан 18-30 насны найман бүлэг этгээдийг  баривчилсан. Тэд хохирогчийн анхаарлыг сарниулан 12 сая 760 мянган вонн буюу монгол мөнгөөр 27 сая төгрөгийг хулгайлж, “Найман шарга” вальют арилжааны төвд солиулан  мөнгөө хувааж авсан нь илэрсэн” гэв.

Мөн дээрх гэмт этгээдүүд өмнө нь гэмт хэрэгт холбогдож байсан гэнэ. Тухайлбал, сэжигтэн А нь Хонгкогт хар тамхины хэргээр зургаан жилийн ял эдэлж байгаад нэг жилийн өмнө суллагдан Монгол Улсад ирсэн байна. Улмаар бусадтай нийлж, зохион байгуулалттайгаар бүлэг хулгайн хэрэг үйлдэж байгаад баригджээ. Харин сэжигтэн Х нь гэр бүлийн хүчирхийлэл үйлдэж, СХД-ийн цагдаагийн I хэлтэст шалгагдан эрэн сурвалжлагдаж байсан гэдгийг цагдаагийн газраас мэдээллээ. Тус хэргийг Сүхбаатар дүүргийн цагдаагийн I хэлтэс үргэлжлүүлэн шалгаж байна.