Ардчилсан нам өнөөдөр наймдугаар их хурлаа хийж,  Монгол Улсын Ерөнхийлөгчийн сонгуульд өрсөлдөх нэр дэвшигчээ батламжилна.

Тус намаас Ерөнхийлөгчийн сонгуульд нэр дэвшигчийг тодруулах дотоод сонгууль энэ сарын 3-нд болж, УИХ-ын гишүүн асан Х.Баттулга хамгийн их санал авснаар Ерөнхийлөгчийн сонгуульд өрсөлдөх эрхтэй болсон байдаг.

Харин өнөөдөр болж буй намын их хурлаар дотоод сонгуульд хамгийн өндөр оноо авсан Х.Баттулгын нэрийг хэлэлцүүлж, нууц санал хураалт явуулна.

Мөн хуралдаанаар нэр дэвшигчээ батламжлахаас гадна Үндэсний бодлогын хорооны 389 гишүүнээ батламжлах аж. Хэрвээ нэр дэвшигч Х.Баттулга Их хурлаасаа дэмжлэг авч чадахгүй бол Их хурлын бүрэн эрхийн хүрээнд үргэлжлүүлэн хэлэлцэж батлах юм байна.