Туркид өчигдөр Ерөнхийлөгчийн эрх мэдлийг нэмэгдүүлэх талаар үндсэн хуульд нэмэлт өөрчлөлт оруулах эсэх талаарх бүх нийтийн санал асуулга явууллаа.

Нийтдээ 18 заалтаас бүрдэх шинэ үндсэн хууль батлагдсанаар өнөөгийн парламентын засаглалаас бүх эрх мэдэл Эрдоганы гарт төвлөрч, “турк маягийн Ерөнхийлөгчийн засаглал” руу шилжих билээ.

Гэвч санал асуулгын дүн гарав уу үгүй юу Европт маргаан мэтгэлцээн гарч эхэлсэн байна. Хэдийгээр Туркчуудын дийлэнх нь Үндсэн хуульд өөрчлөлт оруулахыг дэмжсэн ч, эл өөрчлөлт орсноор улс төр, эдийн засгийн байдал нь тогтворжих уу гэдэг эдүгээ таамаг төдий хэвээр байна.

Тус улсын “Анатоли” агентлагийн мэдээлснээр санал тооллогын явц 90 гаруй хувьтай байхад санал асуулгад оролцогсдын 52 хувь нь дэмжсэн үзүүлэлттэй байжээ. Харин 48 хувь нь эсрэг хариулт дугуйлсан байжээ.