Завхан аймгийн Онцгой комисс хуралдаж, Цагаанхайрхан сумыг өндөржүүлсэн бэлэн байдлын зэрэгт шилжүүлжээ.

Тодруулбал, тус сумын Цэцэрлэг багийн малчны охин гэнэт халуурч, биеэр нь тууралт гарсан зовиуртай байсан аж. Тиймээс сумынхаа эмнэлэгт энэ сарын 18-нд дуудлага өгсөн ч  сум, багийн эмч нар өвчтөнд анхны үзлэг хийж, менингококкт гэж үзэн, Завхан аймгийн эмнэлэгт дуудлага өгсөн байна.

Тус аймгийн эмнэлгээс нарийн мэргэжлийн эмч нарын баг ажиллаж, өвчтөнд клиник онош тавьж шинжилгээ, анхан шатны эмчилгээ хийж, халууныг бууруулж, хүүхдийн биеийн байдлыг тогтворжуулжээ.

Өнөөдрийн байдлаар хүүхдийн биеийн байдал тогтворжсон, цаашид оношийг баталгаажуулах нарийн шинжилгээг давтан хийх аж. Халдварт өвчний нэг тохиолдлыг дэгдэлт гэж үздэг байна. Халдварын нууц хугацаа 5-10 хоног үргэлжилдэг байна.

Тиймээс энэ бүс нутагт дэгдэлтийг даамжруулахгүй байх зорилгоор энэ сарын 18-29-ний өдрүүдэд хорио цээрийн дэглэм тогтоохыг тус аймгийн Онцгой комиссоос гаргасан байна.  Мөн Завхан аймагт гуравдугаар сарын 23, 24-ний өдрүүдэд болох хурдан морины бүсийн уралдааныг цуцлах шийдвэрийг гаргасан аж.