Зэвсэгт хүчний 96 жилийн ой, Монгол цэргийн өдөр өнөөдөр тохиож байна. Эх орныхоо эрх чөлөө, тусгаар тогтнолын төлөө цогтой тэмцэж ирсэн үе үеийн халуун эх орончдын үргэлжлэл болж, эх орноо батлан хамгаалах хариуцлагатай бөгөөд хүндтэй үйл хэргийг үргэлжлүүлж буй цэрэг эрс, айл гэрийн ноён нуруу болж яваа эр хүн танд баярын мэнд хүргэе.

Эр цэргийн баяр болж байгаатай холбогдуулан тоглолтын хуваарийг сонирхуулж байна.

ГУРАВДУГААР САРЫН 18

Улсын Дуурь, бүжгийн эрдмийн театр:

А.Хачатурян "Спартак" балет. Тус балетад Ромын эсрэг боолын бослогын удирдагч Спартакийн тухай өгүүлдэг. Эмгэнэлтэй төгсгөлтэй ч үйл явдлаар түүхэн эрх чөлөөний баатарлаг тэмцлийг харуулдаг аж. Манай улсад 1984 оны тавдугаар сарын 5-ны өдөр балетмейстер УГЗ, Төрийн шагналт, Хөдөлмөрийн баатар Б.Жамъяндагва, Ардын зураач Ч.Гунгаасүх, удирдаач Төрийн шагналт, Ардын жүжигчин Ж.Чулуун нар  балетыг найруулан тайзны бүтээл болгосон түүхтэй юм байна.  “Спартак” балетыг энэ сарын 18-нд 17.00 цагт УДБЭТ-ын тайзнаа тоглоно.

Улсын Драмын эрдмийн театр:

Аугаа хайр дурлалын мөнхийн дуулал болсон “Парисын дарь эхийн сүм” сонгодог мюзикл жүжгийг 15.00 цагаас тоглоно.

Дүрүүдэд:

• Эсмеральда Н.Баярмаа
• Квазимода С.Болд-Эрдэнэ /СТА/
• Фроло хамба Г.Эрдэнэбилэг /СТА/
• Феб М.Түвшинхүү /СТА/
• Гренгуар Л.Дэмидбаатар /МУГЖ/
• Гудул Б.Нармандах /СТА/
• Клопен Б.Жаргалсайхан /МУГЖ/
• Лис Ц.Баясгалан /СТА/
• Олны хэсэгт театрын нийт уран бүтээлчид.