Говь-Алтай аймаг дахь цагдаагийн газар хурандаа генерал Ж.Авхиагийн нэрэмжит болсон байна.  
Тус аймаг дахь Цагдаагийн газрын зүгээс гаргасан “Говь-Алтай аймаг дахь цагдаагийн газрыг хурандаа генерал Ж.Авхиагийн нэрэмжит болгох тухай” хүсэлтийг аймгийн Засаг дарга, Засаг даргын тамгын газар хүлээн авч судалсны үндсэн дээр дэмжжээ.

Улмаар аймгийн ИТХ-аас энэ сарын 14-ний өдөр “Улсын цагдаан сэргийлэх ерөнхий газрын нэгдүгээр орлогч дарга, НАХЯ-ны сайд, Монгол Улсын Ерөнхий прокурор, БХЯ-ны сайд зэрэг өндөр албан тушаалд ажиллаж байсан Говь-Алтай аймгийн Шарга сумын харьяат Монгол Улсын харцага, хууль цаазын жинхэнэ зөвлөх, хууль зүйн шинжлэх ухааны доктор, профессор, Монгол Улсын гавьяат хуульч, хурандаа генерал Жарантайн Авхиагийн дурсгалыг нь мөнхжүүлэх зорилгоор Говь-Алтай аймаг дахь цагдаагийн газрыг нэрэмжит болгох” тухай түүхэн шийдвэрийг гаргажээ.

Аймаг дахь Цагдаагийн газрыг Ж.Авхиагийн нэрэмжит болгосонтой холбогдуулан түүний гавьяат үйлсийг залуу хойч үеийнхэнд таниулж, алдаршуулж ажиллахыг аймгийн Засаг дарга, Цагдаагийн газрын дарга нарт даалгасан байна.