Өмнөговь аймгийн нутаг дэвсгэрт нүүрс тээвэрлэдэг жолооч нар амиа алдсан харамсалтай хэрэг өнгөрсөн бямба гарагт гарсан билээ.

Эргэн сануулахад, “Эрдэнэс Тавантолгойн” компанийн тээвэрлэлтийг хийдэг Хятад эзэнтэй, “Монфорт” компанийн зургаан жолооч Тавантолгойн ордоос 90 км-т байрлах цайны газарт хооллохдоо согтууруулах ундаа ууцгаасан ажээ. Тэдний гурвынх нь бие огцом муудаж нас барсан юм. Харин үлдсэн гурван жолоочийн биеийн байдал муудаж, эмнэлэгт хүргэгдсэн. Тэгвэл хоёр залуугийн цогцсыг өчигдөр нийслэлд авч ирсэн байна.

Одоогийн байдлаар хоёр жолооч нь Өмнөговийн эмнэлэгт сэхээнд биеийн байдал нь хүнд байдалтай байгаа гэнэ. Урьдчилсан байдлаар хоол, архины хавсарсан хордлого гэх оношийг тавьсан байна. Мөн техникийн спиртэд  хордсон байж магадгүй гэх мэдээлэл байгаа юм.