Азербайжаны нийслэл Баку хотноо жүдо бөхийн “Их дуулга” ангиллын тэмцээн болж өндөрлөлөө. Өчигдөр хүнд жингийнхний барилдаан болж өндөрлөсөн. Манайхаас эрэгтэйчүүдийн +100 кг-д Ө.Дүүрэнбаяр, эмэгтэйчүүдийн -78 кг-ын жинд Ц.Наранжаргал нар гарч барилдсан ч медальд хүрч чадсангүй.

Ө.Дүүрэнбаяр эхний тойрогтоо Сербийн бөх Зарко Кулумыг ялсан бол хоёрдугаар тойрогт Азербайжаны Кокаури Ушангид цэвэр ялагдсан. Харин дагах барилдаанд Бразилын Сиьлва Рафаэльтэй тулж ялсан ч хүрлийн төлөө Украины бөх Бондаринко Станиславыг барсангүй.

Ц.Наранжаргалын хувьд эхний тойрогтоо Казахстаны Ралфова Заринаг ялсан ч хоёрдугаар тойрогт Недерландын Веркирк Мариндиг барсангүй. Улмаар торгуулийн тойрогт Бразилын бөх Соарес Самантад цэвэр ялагдаж, тэмцээнээ дуусгалаа.

Энэ удаагийн Бакугийн “Их дуулга” тэмцээнийг багийн дүнгээр Недерланд тэргүүллээ. Недерландын жүдочид 3 алт, 1 мөнгөн медаль хүртсэн бол Азербайжан 1 алт, 2 мөнгө, 4 хүрэлтэйгээр хоёрт орж, Японы гуравдугаар байрт жагслаа. Манай улсын хувьд алт, хүрэл медальтайгаар 6 дугаар байрт бичигдсэн юм.