Нийслэлийн Засаг дарга С.Батболд өнөөдөр Баянзүрх дүүргийн Засаг даргатай холбоотой асуудлаар мэдээлэл хийлээ. Учир нь түүний гаргасан Баязүрх дүүргийн Засаг даргын томилгооны захирамжийг нийслэлийн Захиргааны хэргийн анхан шатны шүүхээс түтгэлзүүлжээ. Тэрбээр мэдээллийн үеэр “Өнгөрсөн аравдугаар сард  аймаг, нийслэл, сум дүүргийн ИТХ-ын сонгууль нийслэлийн есөн дүүргийн найман дүүрэгт нь  амжилттай явагдаж,  Засаг дарга нарыг нь  батламжилсан. 

Есөн дүүргээс  долоод нь МАН-аас нэр дэвшсэн төлөөлөгчид олонх болсон, хоёрт  АН олонх болсон.  Харин Баянзүрх дүүргийн 41 тойргийн 35 тойрогт нь сонгууль маргаангүй  явагдсан ч зургаан тойрогт  маргаан үүссэн. Дээрх  суудалд нэр дэвшигчдийн талаархи шүүхийн шийдвэр эцэслэн гарах хүртэл би хүлээцтэй хандсан. Таван сарын хугацаанд хүлээсэн. Дүүргийн ИТХ асуудлаа шийдэх ёстой гэж хүлээсэн.

Хоёрдугаар сарын 23-нд дүүргийн сонгуулийн хорооноос   зургаан  тойрогт дахин сонгууль явуулах ёстой гэсэн шийдвэр гарсан. Тиймээс олонх нь болох 35 төлөөлөгчийн саналыг харгалзан гаргасан  ИТХ-ын шийдвэрийг үндэслэн Э.Бат-Амгаланг  дүүргийн Засаг даргаар батламжилсан. Өнгөрсөн долоо хоногт миний шийдвэртэй холбоотой маргаан үүссэн. Гэхдээ миний гаргасан захирамж  хууль зүйн үндэслэлтэй, үүнийгээ би хаана ч хамгаална. Өөрийн шийдвэрийг шүүхийн өмнө нотлоход бэлэн байна” хэмээсэн юм.