Дорнод, Сүхбаатар, Хэнтий аймгийн нутаг дэвсгэрт гоц халдварт “Шүлхий”, “Хонины цэцэг” өвчин гарч, өвчний тархалт нэмэгдэж байгаатай холбогдуулан дээрх чиглэлд зорчих тээврийн хэрэгслийн хөдөлгөөнийг энэ сарын 3-ны 18:00 цагаас энэ сарын 5-ны өдрийг дуустал хязгаарласан билээ.

Учир нь Сүхбаатар аймгийн Дарьганга сумын нутаг дэвсгэр дэх Алтан-Овоо, Шилийн богд уулыг зорих иргэд, тээврийн хэрэгслийн хөдөлгөөн нэмэгдэж, бусад аймаг сумдад дээрх гоц халдварт өвчнийг тархах эрсдэл гарсан юм.

Үүнтэй холбогдуулан Зам, тээврийн хөгжлийн яам, Онцгой байдлын ерөнхий газар, Автотээврийн үндэсний төв, Замын цагдаагийн албаныхан хуралдаж, энэ сарын 3-5-ны өдрүүдэд түр хугацаагаар хязгаарласан юм. Тэгвэл хорио цээрийн хугацаа өнөөдөр дуусч, дээрх гурван аймгийн хот хоорондын тээврийн үйл ажиллагаа хэвийн явагдаж эхэлсэн байна.