Авто тээврийн хэрэгслийн албан татвар, төлбөрийг улсын дугаарын сүүлийн тооноос хамаарч татвар төлдөг билээ. Тэгвэл энэ сард 3 болон 8-аар төгссөн улсын дугаартай тээврийн хэрэгсэл эзэмшигчид татварын төлбөрөө төлөх хуваарьтай байгаа юм.

Өнгөрсөн нэгдүгээр сард нийслэлийн хэмжээнд нэг болон 6-аар төгссөн улсын дугаартай 80757 тээврийн хэрэгсэл албан татвар, төлбөрт хамрагдах байсан аж.  Үүнээс 24161 буюу 30 хувь нь хамрагдсан байна. Тээврийн хэрэгсэл эзэмшигч заасан хугацаанд албан татвар, төлбөрөө төлөөгүй тохиолдолд Захиргааны хуулийн 32.1-д зааснаар 8000 төгрөгөөр торгох заалттай аж.

Мөн Татварын ерөнхий хуулийн 75.1.4-т зааснаар хувь хүнийг хөдөлмөрийн хөлсний доод хэмжээг 2-3 дахин нэмэгдүүлсэнтэй тэнцэх төгрөгөөр, албан тушаалтныг 3-4 дахин нэмэгдүүлсэнтэй тэнцэхүйц төгрөгөөр торгохоор заасан байдаг байна. Тиймээс заасан хугацаанд авто тээврийн хэрэгслийн албан татвараа төлөхийг холбогдох газраас анхаарууллаа.