Монголбанк 2014 онд Хятадын Ардын банктай 15 тэрбум юанийн своп хэлэлцээрийг 3 жилийн хугацаатай байгуулсан нь ирэх наймдугаар сард дуусна. Гэвч Монгол Улс эдийн засгийн хүндрэлд орсон өнөөгийн нөхцөлд своп хэлцлийн хугацааг сунгах шаардлага үүсээд байгаа.

Өнгөрсөн долоо хоногийн амралтын өдөр ОУВС-тай хөтөлбөр тохиролцох болсон тухай Сангийн яам, Монголбанк, ОУВС хамтран хийсэн хэвлэлийн хурлын үеэр албаны хүмүүс энэ хэлэлцээр сунгагдахаар болсон тухай мэдээлэл өгсөн. 

Бас нэг нааштай мэдээ дуулдсан нь Гадаад харилцааны сайд Ц.Мөнх-Оргил БНХАУ-д хийж буй албан ёсны айлчлалынхаа үеэр энэ асуудлыг хөндсөн нь  хоёр  улсын  үндэсний  мөнгөн тэмдэгтийг солилцох хэлцлийн хугацааг сунгахад бэлэн байгаагаа Хятадын тал мэдэгдсэн юм. 

Үүгээр юанийн своп хэлэлцээрийн хугацаа дор хаяж 3 жилээр сунгагдаж, дүнг нэмэх тухай яригдаж байна. Харин дахин хэлэлцээр хийх тов энэ долоо хоногт төлөвлөгдсөн гэж мэдээлж байсан ч хугацаа одоогоор тодорхойгүй байна.