Италийн Сери А лигийн нөхөн тоглолтууд өнгөрсөн шөнө боллоо. Хүснэгтийг тэргүүлэгч “Ювентус” клуб “Кротоне” клубын талбайд зочилж, 0:2-оор буулгаж авлаа. Ингэснээр 23 тойргийн тоглолт гүйцэж, 57 оноотой болсноор араасаа нэхэж буй “Рома”-гаас 7 оноогоор тасарч байгаа юм.

Тоглолтын 60 дахь минутад Марио Манжукич тооны харьцааг нээсэн. Улмаар 74 дэх минутад Игуаин Сери А лигийн 16 дахь гоолоо оруулж, мэргэн буучийн жагсаалтын хоёрдугаар байрт бичигдэж байна.

Тэгвэл “Милан” клуб нөхөн тоглолтоо “Болонья”-гийн талбайд зочлон хийж, 0:1-ээр буулгаж авлаа. Ингэснээр 40 оноотой болж, 7 дугаар байрт бичигдэж байна. Тоглолтын 36 дахь минутад “Милан”-аас Габриэль Палетта улаан авч, талбайг чөлөөлсөн. Улмаар 59 дэх минутад Юрай Куцка араас нь хөөгдөж, багаа 9 хүнтэй үлдээсэн. Гэвч “Милан” хоёр дутуу байхдаа өрсөлдөгчөө 89 дэх минутад Пашаличийн оруулсан гоолын ачаар хожиж чадлаа.