Дуурь бүжгийн эрдмийн театр нь 54 дэх улирлын тоглолтын хүрээнд “Сонгодог урлаг хүүхдийн боловсролд” уриатайгаар сонгодог урлагаар дамжуулан хүүхдийн боловсрол, ирээдүйн хөгжил төлөвшил, оюун ухаан, ёс суртахуун, бие бялдрын зохих чадавхитай, хүмүүнлэг ёсыг дээдлэн сахидаг, бие бялдрын зөв хөгжилтэй, гоо зүйн мэдрэмжтэй иргэн төлөвшүүлэх зорилготой ажиллаж байгаа ажээ.

Уг үйл ажиллагааны хүрээнд Нийслэлийн Хүүхэд, гэр бүлийн хөгжлийн газар, есөн дүүргийн зорилтот бүлгийн хүүхдүүд болон Нийслэлийн нутаг дэвсгэр дээр үйл ажиллагаа явуулдаг халамж, асрамжийн төвүүдийн хүүхдүүдийг уг хөтөлбөрт хамруулах чиглэлээр хамтран ажиллахаар болсон байна.

Дуурь бүжгийн эрдмийн театр хөтөлбөрт зориулан сар бүр сонгодог урлагийн тоглолтуудыг хүүхдүүдэд зориулан цувралаар зохион байгуулах юм аж. Тус  ажлын хүрээнд НХГБХГ-ын дарга Я.Байгалмаа, ДБЭТ-ийн захирал Ч.Мөнхзул, тус театрын Уран сайхны удирдагч МУАЖ А.Дашпилжээ нар ажил хэргийн уулзалт зохион байгуулж, цаашид хамтран ажиллах чиглэлүүдийн талаар санал солилцжээ.

Хөтөлбөрийн нээлт энэ сарын 7-нд ДБЭТ-т болсон бөгөөд  “Хөхөө намжил” дууриар эхэлсэн байна. Энэхүү хөтөлбөрийг хэрэгжүүлсэнээр сонгодог урлагийн бүтээлээр дамжуулан хүүхдэд гоо зүйн боловсрол олгох, бие хүний эерэг төлөвшлийн суурийг тавих боломж бүрдэнэ хэмээн үзэж байгаагаа албаныхан онцоллоо.