Өмнөговь аймгийн Цогтцэций сумын төвөөс урагш таван км-т Сийрст  нэгдүгээр багийн нутаг дэвсгэрт байрлах “Хадана ус” гэдэг газарт “Норд Бенз” маркийн автомашины чиргүүл хажуугаараа унасан байна. Улмаар тээвэрлэж явсан дизель түлш асгарчээ. Тус мэдээллийн дагуу аймгийн Онцгой байдлын газрын орлогч, урьдчилан сэргийлэх тасгийн дарга, онцгой байдлын дэд хурандаа М.Адъяабаатараар ахлуулсан ажлын хэсэг тус газарт ажиллажээ.

Хэргийн талаар тодруулбал, “Шунхлай” ХХК-ны 44 тонн дизель түлшийг Дорноговь аймгийн Сайншанд сумаас Өмнөговь аймгийн Цогтцэций сумын чиглэлд тээвэрлэж явсан “Норд-Бенз” маркийн автомашины чиргүүл хажуугаараа унаж, тээвэрлэж дизель түлш 2400 м2 талбайд алдагдаж хөрсөнд гүн хэсэгтээ 30 см, зах хэсгээрээ 5-10 см нэвчсэн байна.

Тиймээс Онцгой байдлын ажлын хэсэг шороон замын ховилд тунаж үлдсэн 1150 литр дизель түлшийг битүүмжлэлтэй  саванд зөөвөрлөн, хөрс хуулах ажиллагааг шуурхай эхлүүлэн бохирдсон гадаргууг тусгайлсан цэгт зөөвөрлөж хүн мал, амьтан хүрээлэн буй орчин хордож бохирдохоос урьдчилан сэргийлж ажилласан байна.