Замын цагдаагийн алба хаагчид  гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодож явсан 59 жолоочийг илрүүлэн саатуулж гарч болзошгүй осол хэргээс урьдчилан сэргийлж ажилалаа. Өчигдөр Замын цагдаагийн албанд нийт 281 дуудлага, мэдээ мэдээлэл хүлээн авснаас зам тээврийн ослын 242 дуудлага бүртгэгдсэн байна.

Үүнээс гэмт хэргийн шинжтэй гомдол мэдээлэл 7 бүртгэгдэж, 18 хүн хүнд хөнгөн гэмтжээ. Тухайлбал, Баянгол дүүргийн нутаг Энхтайваны өргөн чөлөө Баруун дөрвөн замын уулзварт Shaolin  маркийн автобусны жолооч Д нь Prius  маркийн Б жолоочтой авто машинтай мөргөлджээ. Улмаар зорчигч 52 настай эрэгтэй Э, 51 настай эмэгтэй Д нарын найман хүн гэмтсэн байна.

Мөн Баянзүрх дүүргийн нутаг Цагдаагийн академийн  өргөн чөлөөнд Нийслэлийн зорчигч тээврийн нэгтгэлийн ОНӨААТҮГ-ын Daewoo BS 106 маркийн автобусны жолооч О нь Эмсид ХХК-ны HAero City 540 маркийн М жолоочтой автомашинтай мөргөлдсөн байна. Улмаар зорчигч 50 настай эмэгтэй Э, 45 настай эмэгтэй Ц нарын дөрвөн хүн гэмтжээ. Тиймээс нийт жолооч замын хөдөлгөөнд анхаарал болгоомжтой оролцохыг замын цагдаагийн газраас анхааруулж байна.