АН-ын шинэчлэл, дүрмийн талаар хэлэлцэх зургадугаар их хурал хоёр өдөр үргэлжилсэн.  Хуралд тус намын гишүүнчлэлтэй 1200 гаруй  төлөөлөл оролцсон бөгөөд “тоон дотор үсэг цохиж явна уу, даа” гэж гайхам нэгэн содон хүн очсон нь БНН-ын дарга “Буян”-гийн Жагаа байв. 

Энэ оны парламентын сонгуульд эрх баригч хүчинд  “үсгүй хусуулсан” АН-ынхан намынхаа шинэчлэлийг ярилцаж байхад мань хүн чухам ямар зорилгоор очив гэдэг нь цахим ертөнцийнхнийг шуугиулаад амжсан. 

Парламентад нэг ч суудал авч чадаагүй БНН-ын дарга улс төрийн карьер нь  бараг дуусч буй тул  сөрөг хүчнийг бараадаж эхлэв үү, аль эсвэл хэрэгт дурлаж явна уу гэдэг нь улс төр сонирхогчдод тун ч сонин байсан нь мэдээж. Гэхдээ “Буян”-гийн Жагаагийн хувьд хуралд оролцсон шалтгаанаа “АН-ыг үүсгэн байгуулагч гэдэг утгаараа сонирхож явна” гэж тайлбарласан байгаа юм.

Ямартай ч, хаалганы цаана ширүүхэн “зодоон”-той, далд найраатай явагдсан гэх АН-ын зургадугаар хурлыг Жагаа үнэхээр сонирхож явсан уу, аль эсвэл сөрөг хүчинд элсэхээр санаархаж явна уу гэдгийг цаг хугацаа л харуулах биз.