Сэлэнгэ аймаг дахь Сүхбаатар боомтоор өнгөрсөн арваннэгдүгээр сарын 30-ны орой их хэмжээний сум оруулж ирэх гэж байгаад баригджээ. Тодруулбал, Эрхүү-Наушк Улаанбаатар чиглэлийн галт тэргээр зорчиж Монгол Улсын хилээр нэвтэрч ирсэн иргэн Г-ийн цүнхэнд их хэмжээний майонез, чокопай, сахар байсан аж.

Түүнийг нь тус аймаг дахь Гаалийн газрын улсын байцаагч шалгаж үзэхэд,  их хэмжээний буюу 100 гаруй хайрцаг сум байжээ. Иргэн Г анх гаалийн улсын байцаагчид мэдүүлэхдээ гэртээ авсан хүнсний зүйлс хэмээсэн гэнэ.

Харин байцаагч хайрцгуудыг задалж үзэхэд винтов зэрэг бууны найман төрлийн 2000 гаруй сум гарч иржээ.  Уг хэргийг  Тагнуулын байгууллага шилжүүлэн авч шалгахаар болсон байна. Иргэн Г нь Монгол Улсын хилээр ОХУ руу нэвтрэхдээ автомашинаар гарч, буцахдаа галт тэргээр орж ирсэн нь энэ гэнэ.

Түүнчлэн түүний тээвэрлэж байсан сумнуудыг нуусан майонез, сахар, чокопай зэрэг нь бүгд үйлдвэрийн лацтай “бүтэн” бүтээгдэхүүн шиг харагдаж байсан гэдгийг албаны эх сурвалж мэдээллээ.