Дорнод аймагт 13 хүн үл мэдэх шингэн уусны улмаас дөрөв нь нас барсан талаар бид өчигдөр мэдээлсэн. Тэгвэл Эрүүл мэндийн яамнаас томилогдсон мэргэжлийн эмч нарын баг Дорнод аймагт ажиллаж байгаа аж.

ЭМЯ-ны Шуурхай удирдлагын албанаас тус аймагт ажиллаж буй мэргэжлийн багийн эмч нартай цахим хурал хийж, өвчтөнүүдийн эмчилгээний талаар санал солилцож, мэргэжил арга зүйн зөвлөгөө өгсөн байна.

Үл мэдэгдэх шингэн ууж хордсон өвчтөнүүдэд эрчимт эмчилгээ, сэхээн амьдруулах яаралтай тусламж үйлчилгээ үзүүлж байгаа талаар ажлын хэсэг мэдээллээ. Одоогийн байдлаар үл мэдэгдэх шингэнг 24 өвчтөн уусан нь тогтоогдоод байгаа юм. Түүнээс таван  өвчтөнийг гемодиализийн эмчилгээнд оруулжээ. Өвчтөнүүдийн биеийн байдал тогтворжих хандлагатай байна хэмээн албаныхан мэдээлсэн юм.