Нийслэлийн Онцгой байдлын газарт цаг агаарын нөхцөл байдлын улмаас эрэн хайх, аврах ажиллагааны гурван дуудлага иржээ. Тухайлбал, Багахангай дүүргийн 1 дүгээр хороо, дүүргийн төвөөс таван км зайтай “Алсын худаг” гэдэг газар иргэн 45 настай, эрэгтэй малдаа яваад сураггүй болсон гэсэн дуудлага ирсэн байна.

Дуудлагын дагуу Онцгой байдлын хэлтсийн Гал түймэр унтраах, аврах 80 дугаар ангийн албан хаагчид эрэн хайх ажиллагааг зохион байгуулж,  18:27 цагт Алсын худаг газраас 5 км зайтай БХД-ийн 1 дүгээр хороо, Өндөр толгой гэдэг газраас 500 гаруй бог малтай төөрсөн байсныг олж, амийг нь аварчээ.

Мөн Төв аймгийн Сэргэлэн сумын 4 дүгээр баг, Багахангай дүүргээс 10 км зайтай Үнэгтэй энгэр гэдэг газарт малдаа яваад сураггүй боллоо гэх дуудлага ирсэн аж. Дуудлагын дагуу авран хайх ажиллагаа явуулж, Үнэгтэй энгэр гэдэг газраас 9 км зайтай тус аймгийн Баян сумын 3 дугаар баг, Хэхэрийн хоолой гэдэг газар 1000 гаруй бог малтай төөрсөн байсныг эсэн мэнд олж, ар гэрийнхэнд нь хүлээлгэн өгсөн байна.

Түүнчлэн Төв аймгийн Баян сумын 1 дүгээр баг, Санд гэдэг газраас Багахангай дүүргийн төврүү явж байсан 3 иргэн төөрсөн, автомашины шатахуун дуусан гэсэн дуудлага ирчээ. Тус дуудлагын дагуу Багахангай дүүргийн Онцгой байдлын хэлтсийн Гал түймэр унтраах, аврах 80 дугаар ангийн албан хаагчид эрэн хайх ажиллагаа явуулсны дүнд 39 настай, эрэгтэй, 38 настай, эмэгтэй, 51 настай, эрэгтэй нарыг олсон байна. Тиймээс иргэд малчдад цасан шуургатай үед холын замд явахгүй байхыг НОБГ анхаарууллаа.