Аж үйлдвэр эрдэс баялгийн сайдын зөвлөлийн анхдугаар хуралдаан болж өндөрлөлөө. Хуралдаанд салбар яамны бодлогын газрын төлөөлөл, харьяа агентлагууд болон холбогдох газрын төлөөллүүд оролцож уул уурхайн салбарт тулгамдаж буй асуудал, түүнийг шийдвэрлэх хууль эрхзүйн орчныг сайжруулах хуулийн төслүүд дээр санал дүгнэлтээ хэлэлцлээ.

Аж үйлдвэр эрдэс баялгийн яамны хурлын зааланд 2026 оны 02 дугаар сарын 02-ны өдөр зохион байгуулсан энэхүү анхдугаар хуралдааныг нээж сайд Г.Дамдинням хэлсэн үгэндээ ” Манай салбар 2026 онд эрхзүйн шинэчлэлийн жил зарлаж байгаа. Энэ хүрээнд дөрвөн багц том хуулийг оруулж байна” гэсэн юм. Сайдын танилцуулснаар,

• Ашигт малтмалын тухай хуулийн нэмэлт өөрчлөлт
• Гарын тосны тухай хууль
• Газрын тосны бүтээгдэхүүний тухай хууль
• Хүнд үйлдвэрийн тухай хуульд нэмэлт өөрчлөлт оруулахаар тусгажээ.

Эдгээр дөрвөн хууль нь Аж үйлдвэр эрдэс баялгийн салбарын барих гол үндсэн хууль болохыг салбарын сайд Г.Дамдинням яриандаа тодотгов. Хуулийн төслүүдэд оруулж буй нэмэлт өөрчлөлттэй уялдуулан салбарт тулгамдаж буй асуудлаар Уул уурхайн бодлогын газар болон Геологийн бодлогын газрын танилцуулгыг мөн сонссон юм.

Ялангуяа стратегийн гол бүтээгдэхүүн болох алт, зэсийн үнэ дэлхийн зах зээлд өсөж буй энэ цаг үед бид 14 мега төсөлд тусгасан Зэс хайлуулах үйлдвэрийг хөдөлгөх, “Алт-3” аяны талаар хэлэлцэв. Энэ талаар сайд Г.Дамдинням хэлсэн үгэндээ “Алтны үнэ түүхэн дээд амжилтад хүрсэн ч бид нар алтан дээр суусан гуйлгачин болж байна. Алтаа яаж хөдөлгөх вэ. “Эрдэнэс Монгол” нэгдлийн харьяанд байгаа алтны төслүүдийг хэрхэн яаж ашиглах талаар шийдэл гаргая. Энэ Лхагва гарагт Засгийн газрын хуралдаанаар тогтоол оруулж хамтарсан үүрэг авна. Бодлогын чиглэлийг аж үйлдвэрийн сайдын ахалсан хэсэг гаргана” гэсэн юм.

Мөн ОХУ-ын Эрхүү муж орчим хилийн зурваст шатахуун нөөцлөх савтай болох талаар Аж үйлдвэр эрдэс баялгийн яамны Газрын тосны бодлогын хэрэгжилтийг зохицуулах газрын дарга Ч.Хишигдалай болон “Эрдэнэс Монгол” ХХК-ийн гүйцэтгэх захирлын үүрэг гүйцэтгэгч Б.Даваадалай нарт үүрэг болгов. Хурлын төгсгөлд Аж үйлдвэр эрдэс баялгийн сайдын зөвлөлийн анхдугаар хуралдааныг 14 хоног тутам зохион байгуулж, ажлын явц, гүйцэтгэлийн талаарх мэдээллийг сонсож санал дүгнэлтээ нэгтгэнэ гэдгийг сайд Г.Дамдинням илэрхийлсэн билээ.