Нэгдүгээр сарын 04-нд Баянзүрх дүүргийн 27 дугаар хорооны нутаг дэвсгэрт гарсан онц ноцтой хүн амины гэмт хэргийн талаар ЦЕГ-ийн Мөрдөн байцаах албаны дарга, хурандаа П.Очбадрах мэдээлэл өглөө. 

Тэрбээр "Нэгдүгээр сарын 04-ны 10:54 цагт цагдаагийн байгууллагын 102 тугай дугаарт хүний амь нас хохирсон дуудлага мэдээлэл ирсэн. Хэргийн газар дээр хойшлуулашгүй ажиллагаа явагдсан. 07:55-10:52 минутын хооронд 30 настай, жирэмсэн байсан эмэгтэй М, түүний охин 4 настай А нар хутгалагдсан байдалтай нас барсан. Мөн 3 настай А-н гар, сарвуу, нуруунд хутгалагдаж, эрүүл мэндэд нь хүнд хохирол учирсан нөхцөл байдал тогтоогдсон. Тиймээс бид эмнэлгийн анхан шатны туслалцаа үзүүлж, Цэргийн төв эмнэлэгт хүргэсэн. Гурван удаагийн хагалгаанд орсон, биеийн байдал тааруу байна.

Цагдаагийн Ерөнхий газрын тэргүүн дэд даргын тушаалаар ажлын хэсэг байгуулагдсан. Энэ хэрэг дээр онцгойлон ач холбогдол өгч мөрдөн шалгах ажиллагаа явуулж байна. Мөрдөн шалгах ажиллагаатай холбоотой мэдээллийг олон нийтэд өгөх боломжгүй. Нэгдүгээр сарын 5-ны өдрөөс иргэн Б-г тухайн хэрэгт холбогдуулж, 30 хоногийн хугацаатай цагдан хорих, таслан сэргийлэх арга хэмжээ авсан" гэв.