Дотоод цэргийн 05 дугаар ангид хугацаат цэргийн алба хаагчид нэгнээ зодож дэглэж буй бичлэг 2025 оны арванхоёрдугаар сарын 23-нд олон нийтийн сүлжээгээр цацагдсан. Үүний маргааш Засгийн газрын ээлжит хуралдааны үеэр Ерөнхий сайд Г.Занданшатар “…Цэрэг дэглэсэн асуудалтай холбогдуулж ХЗДХ-ийн болон Батлан хамгаалахын дэд сайдаар ахлуулсан ажлын хэсэг байгуулж байна. Та бүхэн дотоодын цэргийн ангиудад газар дээр нь шалгалт хийж, хууль болоод дүрэм зөрчсөн этгээдүүдэд хатуу арга хэмжээ авч ажилла” гэсэн үүргийг өгсөн.

Ажлын хэсгийн ахлагч ХЗДХ-ийн дэд сайд Д.Мөнх-Эрдэнэ өнөөдөр /2025.12.31/-нд

“…Монгол Улсын Ерөнхий сайдаас өгсөн чиг үүргийн дагуу дотоодын цэргийн анги, салбарын үйл ажиллагаа, хууль тогтоомж, цэргийн нийтлэг дүрмүүдийн хэрэгжилтэд хяналт шалгалт хийх чиг үүрэг бүхий Хууль зүй, дотоод хэргийн сайдын 2025 оны А/176 дугаар тушаалаар байгуулсан Ажлын хэсгийн санал, дүгнэлт гарлаа. Дээрх Ажлын хэсгийн санал, дүгнэлтийн дагуу Дотоодын цэргийн штабын дарга Р.Чингис, Дотоодын цэргийн 5 дугаар ангийн захирагч Д.Манлайбаатар, мөн ангийн захирагчийн 1 дүгээр орлогч, штабын дарга Д.Отгонбаатар нарыг үүрэгт ажлаас чөлөөллөө” хэмээн мэдээлэв. 

Ийн, цэрэг дэглэсэн асуудлаар Дотоодын цэргийн штаб, ангийн дарга нарт хариуцлага тооцлоо. Дашрамд хэлэхэд, Бригадын генерал Р.Чингис Дотоодын цэргийн штабын даргын албан тушаалаас хоёр дахиа чөлөөгдөж байна. Энэ удаад цэрэг дэглэсэн асуудлаар ХЗДХ-ийн сайд Б.Энхбаярын тушаалаар чөлөөлөгдөж байгаа бол өмнө нь 2025 оны нэгдүгээр сарын 9-нд ХЗДХ-ийн сайд О.Алтангэрэлийн тушаалаар чөлөөлөгдөж байв. Тэгж чөлөөлөхийн өмнө “…Дотоодын цэргийн штабын дарга Р.Чингис өөрийн дүү болон нэр бүхий компанийн Гашуунсухайт-Ганц модны хил дамнасан төмөр замын хэлцлийг эсэргүүцсэн жагсаалыг санхүүжүүлж байгаа. Тэд эрх ашиг нь зөрчигдөж байгаа компанитай холбоотой” гэж гэж Ерөнхий сайд Л.Оюун-Эрдэнэ мэдэгдсэн. Харин Л.Оюун-Эрдэнийг Ерөнхий сайдаас огцруулсны дараа шүүх “…Р.Чингисийг хууль бусаар ажлаас чөлөөлсөн” гэж үзсэн. Энэ дагуу Бригадын генерал Р.Чингисийг хоёр сар гаруйн өмнө Дотоодын цэргийн штабын даргаар дахин томилоод байсан юм.