Монголын үндэсний бөхийн холбооноос зохион байгуулдаг дөрөвдүгээр сарын цуврал барилдаан Дорнод аймгийн “Дорнын хүчтэн” дэвжээ, Сүхбаатар аймгийн Онгон сумын түүхт 100 жилийн ойд зориулсан Монгол улсын өсөх идэр харцага Дахын Одсүрэнгийн нэрэмжит улс аймгийн цолтой бөхийн барилдаанаар эхэлсэн. Өнгөрөгч амралтын өдөр буюу дөрөвдүгээр сарын 12-д Монгол улсын Ерөнхий сайд, Улсын хошой баатар, Маршал Х.Чойбалсангийн нэрэмжит улс аймгийн цолтой 128 бөхийн барилдаан боллоо.  

Барилдаанд Завхан аймгийн Яруу сумын харьяат, "Хилчин" спорт хороо, ХЦ-0208 анги, Жем Интернэйшнл ХХК, "Даян" дэвжээний бөх, улсын заан М.Лхагвагэрэл түрүүлж, Завхан аймгийн Их-Уул сумын харьяат, Даян дэвжих групп, Даян дэвжээний бөх, улсын начин Б.Чимэдвандан үзүүрлэв.

Дөрөвт Дорнод аймгийн Дашбалбар сумын харьяат, "Аврагч" спорт хороо, Степ Гоулд ХХК, Бүрэн Дуулга ХХК, Цагаан Сор ХХК, "Дорнын Хүчтэн" дэвжээний бөх, улсын заан Д.Анар, Баянхонгор аймгийн Баянбулаг сумын харьяат, "Хүч" спорт хороо, ЦЕГ, "Мөнхийн үсэг" групп, "Нэгдэл" клуб, Бадрах өглөө ХХК, "Их Богд" дэвжээний бөх, улсын үнэн зоригт харцага Н.Золбоо нар шалгарлаа. Улсын заан Б.Бат-Өлзий, аймгийн хурц арслан Н.Амгаланбаатар, аймгийн арслан Д.Бадаигарав, аймгийн заан Д.Батбаяр нарын бөхчүүд шөвгийн наймд үлдэв.

Барилдааны дүйз

Тавын даваа

1. У/з Д.Анар – а/з Д.Батбаяр
2. у/з Б.Бат-Өлзий – у/х Н.Золбоо
3. у/з М.Лхагвагэрэл – а/а Д.Бадамгарав
4. у/н Б.Чимэдвандан – а/а Н.Амгаланбаатар

Зургаагийн даваа

• у/з Д.Анар – у/н Б.Чимэдвандан
• у/з М.Лхагвагэрэл – у/х Н.Золбоо

Долоогийн даваа

• у/з М.Лхагвагэрэл – у/н Б.Чимэдвандан

Зохион байгуулагчдын зүгээс үзэгчдийн дундаас 3 азтан тодруулж, Маршалын хөрөг бүхий хивс, 1.000.000 төгрөг, хурдан удмын адуу гардуулсан бол түрүү бөх 10 сая, үзүүр бөх 5 сая, дөрөвт үлдсэн бөхчүүд тус бүр 2 сая төгрөгийн бай шагнал гардсан юм.

Монгол бөхийн өргөөнд энэ долоо хоногийн амралтын өдрүүдэд “Хамбын бор”, “Урт гарт” хэмээх Монгол Улсын хүчит арслан Маамын Лхагвын нэрэмжит улс, аймаг, сумын цолтой хүчит 256 бөхийн барилдаан, Улаанбаатар хотын аварга шалгаруулах Чансаа өндөр бөхчүүдийн 3х3 халз барилдаанууд тус тус болно.