"Транспэрэнси Интернэшнл" байгууллагын Улс төрийн намын санхүүжилтийн асуудал хариуцсан зөвлөх шинжээч ноён Хорге Валладарес Монгол Улсад хийж буй албан айлчлалынхаа хүрээнд Хууль зүй, дотоод хэргийн яаманд тавьсан хүсэлтийн дагуу Хууль зүй, дотоод хэргийн сайд О.Алтангэрэл өнөөдөр (2025.04.10) хүлээн авч уулзлаа.

Уулзалтын эхэнд, салбарын сайд өнгөрсөн оны 12 дугаар сард "Транспэрэнси Интернэшнл" байгууллагын Төлөөлөн удирдах зөвлөлийн дарга ноён Франсуа Валериантай Улаанбаатар хотноо уулзсан талаар дурдаад тухайн цаг үед танилцуулж байсан авлигын эсрэг, хүний эрх, эрх чөлөөний нөхцөл байдлыг дээшлүүлэх зорилго бүхий бодлогын зарим ажлын хэрэгжилт, үйл явцын талаар мэдээлэл өглөө.

Ноён Хорге Валладаресын хувьд улс төрийн намын санхүүжилт, ил тод байдал сэдвээр Сонгуулийн ерөнхий хороотой хамтарсан үйл ажиллагаа зохион байгуулахаар Монгол Улсад ажиллаж буй тухайгаа мэдэгдсэн. Улмаар Монгол Улсын Засгийн газраас хүчин чармайлт гаргаж буй хууль бус хөрөнгө хураах тухай алхам, хэрэгжилт нь Авлигын төлөөллийн индекст 50+ хувийн эерэг нөлөө үзүүлдэг болохыг тус байгууллагаас 2019 онд хийсэн судалгааны дүн харуулсан талаар дурдлаа. Хариуд нь О.Алтангэрэл сайд Засгийн газраас энэ цаг үед хэрэгжүүлж буй бодлого, шийдвэрүүд хэрэгжиж эхлэхэд Авлигын төсөөллийн индекс дэх Монгол Улсын оноонд онцгой ахиц гарна гэдэгт эргэлзэхгүй байгаагаа илэрхийлэв.

Уулзалтад, "Транспэрэнси Интернэшнл" байгууллагын Ази, Номхон далайн бүс нутаг хариуцсан захирал хатагтай Илхам Мохамед, "Транспэрэнси Интернэшнл Монгол" байгууллагын гүйцэтгэх захирал Э.Мөнхжаргал, Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Л.Нямгэрэл, ХЗДХЯ-ны Олон улсын гэрээ, гадаад хамтын ажиллагааны газрын дарга Ч.Нарантуяа, зөвлөх Д.Тэгшбаяр нарын төлөөлөл байлцлаа.