Монгол-Германы хамтарсан ашигт малтмал, технологийн их сургуулийн “Үйлдвэрлэлийн өдөрлөг 2025” арга хэмжээ амжилттай зохион байгуулагдаж, 30 гаруй компанийн 100 гаруй төлөөлөл оролцлоо. Өдөрлөг нь аж үйлдвэрийн байгууллагууд болон дадлага хийх гэж буй МГТИС-ийн болон Налайх Политехник Коллеж-ийн оюутнууд, ажлын байр хайж байгаа шинэ төгсөгчдийг хооронд нь холбох зорилгоор жил бүр зохион байгуулагддаг уламжлалтай.

Энэ үеэр инженерийн мэргэжлийн оюутнууд дадлагын хугацаандаа ямар мэдлэг чадварт суралцах хэрэгтэй талаарх мэдээллийг багш нарын зүгээс танилцуулсан юм. Мөн оролцогч байгууллагуудын мэргэжилтнүүдээс намтраа хэрхэн бичих, ажлын ярилцлагад хэрхэн амжилттай бэлтгэх гэхчлэн олон талын хэрэгтэй зөвлөгөөг ажил горилж буй шинэ төгсөгчид, оюутнуудад хүргэлээ. Түүнчлэн аж үйлдвэрийн салбарт нэвтрүүлсэн шинэ дэвшилтэт технологи, тэдгээрийг үр дүнтэй ашиглахад төгсөгчдөөс ямар мэдлэг, ур чадвар шаардагдаж байгаа тухай оролцогчид санал бодлоо илэрхийлж байлаа.

“Үйлдвэрлэлийн өдөрлөг 2025” арга хэмжээг зохион байгуулахад ХБНГУ-ын Эдийн засгийн хамтын ажиллагаа, хөгжлийн яамны санхүүжилтээр Германы олон улсын хамтын ажиллагааны нийгэмлэгийн GIZ Mongolia хэрэгжүүлж буй GMIT IV төсөл дэмжин ажиллалаа.