Мягмар гарагийн шөнө /2024.03.26/ АНУ-ын Балтимор хотын томоохон "Francis Scott Key Bridge" гэсэн гүүрийг Сингапур улсын далбаа бүхий "Dali" гэсэн нэртэй контейнер ачааны томоохон усан онгоц мөргөсний улмаас гүүр бүхэлдээ нурсан. Тухайн үед гүүрэн дээр засварын ажил хийж байсан найман хүн, хэд хэдэн тээврийн хэрэгсэл гол руу унасан юм.

Тэднийг эрэн хайх, аврах ажиллагааг яаралтай эхлүүлж, хоёр хүнийг нь эсэн мэнд олоод байв. Харин зургаан хүнийг 18 цагийн турш хайсны эцэст амь үрэгдсэн байх магадлалтай гэж үзэж байна хэмээн эргийн хамгаалагчид мэдэгдлээ. 

Тодруулбал голын ус хэтэрхий хүйтэн мөн ажилчид усанд унаснаас хойш урт хугацаа өнгөрсөн тул амиа алдсан байх магадлалтай гэж таамаглаж байгаа гэв. 

Түүнчлэн голын усанд хөвөх гүүрний хэлтэрхийнүүдийн улмаас эрэн хайх ажиллагаанд хүндрэл учирч байгаа аж. Гүүрийг мөргөсөн хөлгийн багийн 22 гишүүн бэртэж гэмтээгүй, аюулгүй байгаа гэв. 

АНУ-ын Ерөнхийлөгч Жо Байден гүүрний сэргээн засварлах ажлын зардлыг Засгийн газар бүрэн хариуцна хэмээн мэдэгдсэн.