УИХ дахь МАН-ын бүлгийн ээлжит хурал болжээ. Хуралдаанаар хоёр асуудал хэлэлцсэн байна. Нэгдүгээрт, 2024 оны хаврын чуулганаар тэргүүн ээлжид хэлэлцэх асуудлуудын талаар ярилцжээ. Хоёрдугаарт, зудын эрсдэлийг бууруулах чиглэлээр авч хэрэгжүүлсэн болон цаашид төлөвлөж байгаа арга хэмжээний талаар Шадар сайдын мэдээллийг сонссон байна.

Энэ талаар УИХ дахь Монгол Ардын Намын бүлгийн дарга Д.Тогтохсүрэн “Хаврын чуулганаар тэргүүн ээлжид хэлэлцэх 10 орчим хууль, шийдвэрүүд байна гэж үзлээ. Тухайлбал, УИХ-ын тухай хууль, УИХ-ын чуулганы хуралдааны дэгийн тухай хуулиудыг заавал хэлэлцэж батлах ёстой. Дараагийн парламентад дэг нь, хууль нь бэлэн байх ёстой. Тиймээс үүнийг тавдугаар сарын 15-наас өмнө хэлэлцэж, батлах нь зүйтэй гэж үзэж байгаа. УИХ 126 гишүүнтэй болж байгаа учраас дэгийн хувьд өөрчлөгдөж байгаа зүйл олон бий.

Хоёрдугаарт, Баялгийн сангийн тухай хууль. Засгийн газраас ойрын үед өргөн барина, хуулийн төсөл бэлэн болсон. Үүнийг бид хэлэлцэж батлах ёстой. 2024 оны мөрийн хөтөлбөрт Баялгийн сангийн тухай хууль гаргана гэсэн гол заалт бий.

Гуравдугаарт, Хот тосгоны эрхзүйн байдлын тухай хуулийг хэлэлцэж батлахаар байгаа.

Дөрөвдүгээрт, хувийн хэвшлийг дэмжих чиглэлийн 2-3 хууль бий, эдгээрийг хэлэлцэж батлах нь зүйтэй гэж үзэж байна. Энэ мэтчилэн хэд, хэдэн хуулийг өргөн барьж, хаврын чуулганаар хэлэлцэж батлах нь зүйтэй.

Цас ойр, ойрхон орж, шуурч мал аж ахуйн салбарт хүндрэлүүд үүсэж байгаа. Энэ талаар мэдээллийг сонслоо. Үүнтэй холбогдуулан бүлэг Засгигйн газрыг хоёр чиглэлээр ажиллах нь зүйтэй гэж үзсэн. Зудын эрсдэлийг бууруулах тодорхой арга хэмжээнүүдийг боловсруулж УИХ-д танилцуулах. Малчдын зээлийн хүүг хойшлуулах, малжуулах хөтөлбөр гэх мэтчилэн саналыг боловсруулах шаардлагатай гэж үзлээ.

Мал аж ахуйн салбар одоогийн байгаа хэлбэрээр хөгжих боломжгүй боллоо. Тийм учраас цаашид хэрхэн хөгжүүлэх вэ гэдэг тодорхой саналыг бэлтгэж УИХ-д оруулж ирэх чиглэлийг бүлгээс өглөө” гэв.