Баянзүрх дүүргийн 26 дугаар хорооны нутаг дэвсгэрт гарсан ослын үр дагаврыг арилгах, галд өртсөн 207-р байранд мэргэжлийн байгууллагын дүгнэлт гаргуулж, сэргээн засварлах, хохирсон иргэдийг түр амьдрах орон байраар хангах зэрэг асуудлыг УОК, Нийслэлийн онцгой комисс болон холбогдох байгууллагууд хариуцан ажиллаж байна.

Засгийн газрын өчигдрийн хуралдаанаар энэ асуудлын талаар УОК, НОК-ийн мэдээллийг сонсоод, орон сууцыг нь засварлах хүртэл 207-р байрны 61 өрхийг түрээсийн байраар хангах, үүнд шаардлагатай 1.4 тэрбум төгрөгийн санхүүжилтийг Засгийн газрын нөөц сангаас гаргахаар шийдвэрлэсэн. Айл өрхүүдийг орон байраар хангах ажлыг НЗДТГ хариуцан ажиллахаар болсон юм. 

Эдгээр асуудлыг хэрхэн шийдвэрлэж буй талаар өнөөдөр /2024.01.27/ 14.00 цагт УОК, НОК-иос “Хангарди” ордонд мэдээлэл хийнэ. Засгийн газраас 207-р байрыг сэргээн засварлах ажлыг 9-р сарын 1-ний дотор гүйцэтгэх үүрэг өгсөн юм.