Х.Өлзий

Монгол орны байгалийн баялгийг хуу хаман хувьдаа завшиж, монголчуудын ирээдүйн амьдралыг хулгайлсан Нүүрсний гэх том хэргийн сонсгол хоёр дахь удаагаа болж өнгөрлөө. 

Монголын ард түмний хэдэн үеэрээ идэж, иргэддээ тэгш хувааж тараавал айл өрх, иргэн бүхэн нь тэрбумтан болохоор шахуу Тавантолгойн орд газрыг МАН-ын далбаан дор УИХ-аас авхуулаад бүх шатны төрийн байгууллага, төрийн өмчит компани аж ахуйн нэгжид ажилладаг хүмүүс шуналынхаа цар хэмжээгээр цөлмөж байсныг  хоёр удаагийн энэ сонсголоос ард түмэн мэдэж авлаа. 

Сонсголд ирсэн хүмүүс, гэрчүүд чухам л хүний санаанд оромгүй хулгай, дээрмийн талаар айж ичихгүйгээр, монголчууд та бидний хэлдгээр “нүүр нь улайж, нүд нь бүлтийхгүйгээр” ид хав болгон ярьж байна. 

Энэ эрх баригчид өмнө нь мэдээлэлд ойр байгаа, эрх мэдэлдээ дулдуйдан ард түмний мөнгөнөөс сая саяар нь, дараа нь тэрбумаар хулгайлдаг байсан бол нүүрсний энэ хэргийн байдлаас харахад бүр их наядаар нь хулгайлдаг болж. 

Зарим ноцтой баримтыг Хуульзүй дотоод хэргийн сайд Б.Энхбаяр өөрөө чангаар уншиж сонордуулав. Тэгэхдээ бүр албан ёсны тамга тэмдэгтэй бармтыг нь барьж харуулж байгаад зарлан тунхаглаж байна. Өөрөөр, хуулийнхны хэллэгээр бол нотлох баримттай юмсанж. 
Харамсалтай нь ийм хаашаа ч зайлах аргагүй нотлох баримтууд дэлгэгдэж байхад хууль хяналтын байгууллагууд юу хийж байдаг юм бол, энэ сонсголд оролцдоггүй юм болов уу, гэм буруутай хүмүүсийг баривчлаад авдаггүй юм гэхэд анхааралдаа аваад шалгаж нягталдаггүг юм болов уу хэмээн ард иргэд гайхширч байна. 

“Таван толгой түлш” компанийн нэг нягтлан бодогч гэхэд л хэдэн зуун сая төгрөгийг нөхрийнхөө хадгаламжийн данс руу шилжүүлчихсэн, Нийслэлийн агаарын бохирдол бууруулах үндэсний хорооны  дарга Ж.Батбаясгалан Улаанбаатарыг агаарын бохирдолгүй болгосны төлөө удирдах зөвлөлийн гишүүд, бас өөрийгөө 1,1 тэрбумаар шагнасан гээд  он сар өдөртэй, тамга тэмдэг, гарын үсэгтэй баримтыг нь харуулаад түүнийг нь хэвлэлүүд, олон нийтийн сүлжээгээр нийтэлж цацаад байхад хуулийнхан л таг чимээгүй. Нүүрсний сонсгол удирдаж байгаа сайд дарга нь хүртэл нүүрсний хулгайч болчих шиг.

Өмнөд хөрш БНХАУ-д бол авлигач, гэмт хэрэгтнийг шууд л хурал зөвлөгөөн дээрээс гавлаад аваад гардаг тухай бид уншиж, зураг дүрс бичлэгийг нь харж л байсан. Харин манай хуулийнхан таг чиг, чухам энэ сонсголд суусан ч юм уу, үгүй ч юм уу. 

Юутай ч “НҮҮРСНИЙ СОНСГОЛ” гэдэг энэ дуулиант ажил эрх баригчдаас  нэг ч хүн үлдэхгүйгээр худалч хулгайч юм байна гэдгийг ард түмэнд мэдүүлж ойлгуулсан ажил боллоо. 

Эрх баригчдын хувьд бол эрх мэдэлтэй л бол юуг ч хулгайлж, ямар ч аргаар хамаагүй  хаман авч баяжиж, хөлжиж, болдгоо олон нийтэд гайхуулсан явдал болоод өнгөрлөө хэмээн ард түмэн халаглаж байна. 

Нүүрсний хулгай гэдэг энэ дуулиан эхлээд нэг бүтэн жил болж байхад манай хуулийнхан “шалгаад л байгаа, шалгаад л байгаа” гэдэг ч бодит үр дүнд хүрээд, Б.Ганхуягаас өөр хүн бариагүй, хориогүй, хамгийн гол зангилаа гэрч болсон тэр хүнээ ч өнөөх сонсголдоо дуудаж ирүүлэлгүй “шүүх зөвшөөрөхгүй байна” гэдэг ганц үгээр халхавчлаад өнгөрлөө. Бүр дээрээсээ төрийн бүх байгууллага, цэрэг цагдаа, шүүх гээд бүгд холилдчихсон энэ том хулгайн хэргийн зохион байгуулагчид өөрсдийнхөө булайг илэрнэ гээд гол гэрчээ дуудахгүй, “битгий ирүүл” хэмээн шүүхийнхэнд үүрэг өгчихөөд жүжиг тоглож байж ч мэдэх хэмээн олон нийт хардаж байна. 

Эх сурвалж: Монголын Мэдээ сонин

2023 оны арванхоёрдугаар сарын 26. Мягмар. №189 (5917)