Монгол Улсад анх удаа зохион байгуулсан олон улсын хэмжээний “Face of Beauty International 2016” гоо бүсгүйн тэмцээний ялагчийн титмийг ОХУ-ын гоо бүсгүй хүртэж, дэд байрт Замби, гуравдугаар байранд Филиппиний мисс шалгарлаа. Харин Монгол Улсаа төлөөлөн оролцсон манай улсын гоо бүсгүй Э.Урангоо дөрөвдүгээр байрт шалгарсан юм.

“Корпорэйт” зочид буудлын Концертын их танхимд болсон энэхүү тэмцээний эцсийн шатны шалгаруулалт үндэсний хөгжмийн “Хөсөгтөн” хамтлагийн тоглолт болон олон улсын гоо бүсгүйчүүд нэгэн зэрэг хамтдаа монгол үндэсний бүжиг бүжиглэж толилуулснаар эхэлсэн. Монгол Улсад анх удаа зохиогдсон олон улсын хэмжээний “Face of Beauty International 2016” гоо бүсгүйн тэмцээнийг “Face of Beauty International" тэмцээнийг үүсгэн байгуулагч Мила Мануэль, "Face of Beauty International 2016"  тэмцээнийг Монгол Улсад зохион байгуулах төслийн удирдагч,  "Монгол гоо сайхан" холбооны тэргүүн Ж.Анхбаяр, Украины 2007 оны мисс, дуучин, жүжигчин Валерия Лукьянова, Монгол талын шүүгч, хөтлөгч П.Анужин, "Face of Beauty international 2015" тэмцээний тэргүүн байрын шагналт, Унгарын мисс Далма Карман болон тус тэмцээний Miss Teen номинацийн ялагч Н.Сото, Missosology сайтын үүсгэн байгуулагч Пави Винтура нар шүүн явуулсан юм.

Хоёр долоо хоногийн турш Улаанбаатар хотноо үргэлжилсэн тус тэмцээний урьдчилсан шалгаруулалтын үеэр “Шилдэг үндэсний хувцастай гоо бүсгүй”-гээр Филиппин, “Шилдэг усны хувцастай 15 гоо бүсгүй”-д Алтайн Бүгд Найрамдах улс, Эквадор, Унгар, Молдав, Монако, Монгол, Мьянмар, Филиппин, Орос, Замби, Словак, Швейцарь, Бельги,  Косово, Прагвай улсын бүсгүйчүүд шалгарч Акүа Фитнесс төвийн захирал Укагийн урласан усны хувцсыг өмсч тайзнаа гарч, Замби улсын миссүүд түрүүлсэн бол “Шилдэг үдшийн гоёлын даашинзтай гоо бүсгүй”-гээр Монголын гоо бүсгүй тодорсон юм.

Харин БОАЖЯ-ны нэрэмжит “Мазаалайн элч” шагналыг Самоа улсын гоо бүсгүй хүртлээ. Тэмцээний үеэр Украины 2007 оны мисс, дуучин, жүжигчин, загвар өмсөгч Валерия Лукьянова өөрийн дууг толилуулсан нь олны анхаарлыг татсан юм. Түүнчлэн  тэмцээний өмнөх шалгаруулалтын  бусад номинациудад шалгарсан гоо бүсгүйчүүдэд Монгол талын шүүгч П.Анужин,  Унгарын мисс Далма Карман, Шүүгч Пуэрто Рикогийн өсвөр насны мисс Н.Сота, Валерья Лукьянова, Пави Винтура нар дараах номинациудад тэргүүлсэн гоо бүсгүйчүүдэд шагнал гардуулсан юм. Үүнд:

“Авьяаслаг мисс”-Монгол
“Ухаалаг мисс”-Орос
“Сайн үйлсийн гоо бүсгүй”-Швейцарь
“Спортлог мисс”-Монако
“Үзэгчдийн таашаалд нийцсэн мисс”-Филиппин
“Нөхөрсөг мисс”-Сибирь
“Фото зургийн дүр төрхтэй мисс”-Япон
“Аялал жуулчлалын элч гоо бүсгүй”-Парагвай
“Өсвөр насны мисс”- Мьянмар улсын миссүүд тодорсон юм.

Гоо бүсгүйн тэмцээний тэргүүн миссийн титмийг хүртсэн ОХУ-ын мисс Алена Раевагийн сэтгэгдлийг сонслоо. Тэрбээр “Үнэнийг хэлэхэд би өөрийгөө ялагч болно гэж бодож байсангүй. Гэхдээ надад үнэхээр сайхан байна. Би Монголд гайхамшигтай сайхан өдрүүдийг өнгөрөөлөө. Энэ миний амьдралын хамгийн мартагдашгүй мөч байх болно. Зөвхөн ялагч болсондоо ч биш энд өнгөрүүлсэн цаг мөч бүхнийг би мартахгүй. Монгол Улсад баярлалаа, тэмцээний зохион байгуулагчид болон надад тусалсан хүн бүхэнд баярлалаа. Хоёр долоо хоног маш хурдан өнгөрлөө. Өдөр бүр бэлтгэл, аялал зугаалгатай байлаа.

Маш олон хүнтэй танилцаж, тэд надад үнэхээр сайхан сэтгэгдэл үлдээлээ. Тиймээс энэ бүхэн дуусч байгаад надад гунигтай байна. Гэхдээ би 2016 оны мисс гэдэг цолтойгоо бүтэн жил явна шүү дээ” хэмээсэн юм. Ийнхүү хоёр долоо хоног үргэлжилсэн “Face of Beauty International-2016” тэмцээн өндөрлөлөө.