Дундговь аймгийн ЗДТГ, “Норовбанзад” сан хамтран зохион байгуулж буй тус наадмын хүрээнд өчигдөр их дуучин Н.Норовбанзадын нэрэмжит Дундговь аймгийн Төв халхын дуулалт жүжгийн театрын уран бүтээлчдийн “ Их хүндэтгэл”, Эрдэнэтийн хүүхэд залуучуудын театрын уран бүтээлчдийн “Эрт урьдын цагт”, Ж.Дорждагвын нэрэмжит ”Тэнгэрийн тэмдэг” хүүхдийн театрын уран бүтээлч хүүхдүүдийн “Нарны хүүхдүүд”, Дундговь аймгийн ардын авьяастнуудын “Өв соёл” отогийн “Нүүдлийн өв соёл” дөрвөн улирлын гэр музей бүхий “Нүүдлийн аялгуу” зэрэг урлагийн тоглолт боллоо. Мөн адууны өв соёлыг сурталчлах “Айрагны амт”, бөх, морь, сур, шагайн “Үндэсний спорт наадгай-Өв соёл”, морин аялал, монгол хоолны шоу, гэрэл зурагчин Э.Мөнхчулууны ”Талд ургасан чулуу” гэрэл зургийн үзэсгэлэн зэрэг арга хэмжээнүүд болж байна.

 

”Уяхан замбуу тивийн наран” урлагийн их наадам өнөөдөр өглөө нар угтах ёслолоор үргэлжлэв. Их газрын чулуу дахь алдарт уртын дуучин Н.Норовбанзадын гэрэлт хөшөө дээр болсон энэхүү арга хэмжээний үеэр уртын дуучид, морин хуурч, бүжигчдийн нар угтсан товч урлагийн тоглолт болж, энд хуран цугларсан олон нийт нар тосон хурайлах ёслол хийлээ.

 

Урлагийн их наадам өнөөдөр Дундговь аймгийн уртын дуучид, морин хуурчид, ардын авьяастнуудын “Нар нь нүүдэллэсэн тэнгэрийн аялгуу” нэгдсэн тоглолт, “Тэнгэр газрын дуун” хүндэтгэлийн тоглолт болон бусад дагалдах арга хэмжээнүүдээр үргэлжлэх юм.

 

Энэхүү урлагийн их наадамд 3500 гаруй уртын дуучин, морин хуурчид оролцож байна хэмээн зохион байгуулагчдаас мэдээллээ.