Дэлхийд чансаагаараа дээгүүрт бичигддэг “Face of beauty international” олон улсын миссийн тэмцээнд оролцохоор Эстони, Словак, Замби зэрэг 60 гаруй орны гоо бүсгүйчүүд Монголд ирээд байгаа. Тэгвэл уг тэмцээний нэгэн сонирхолтой зочин нь “амьд барби” хочит Украины мисс, Валерия Лукьянова  юм.  Тиймээс түүний талаарх сонирхолтой мэдээллийг уншигчиддаа хүргэе.

Валерия Валерьевна Лукьянова 1985 оны наймдугаар сарын 23-нд хуучин ЗХУ-ын бүрэлдэхүүнд багтаж байсан Молдав улсын Тирасполд мэндэлжээ.  Түүний ээж Ирина цэргийн байгууллагад ажилладаг бол аав нь барилгачин аж. Гэхдээ сонирхолтой нь эцэг эх нь ч гэсэн барбитай төстэй царайтай гэнэ.  Тэрбээр хүүхэд байхаасаа л охидын хайрыг татдаг барби  цуглуулдаг байжээ.  Харин эдүгээ өөрөө тэрхүү хүүхэлдэйтэй тун ижилхэн харагддаг болсон юм. Валерия загвар өмсөгч, дуучин, бас жүжигчин. Гэвч түүний эзэмшсэн мэргэжил нь энэ биш. 

Бүсгүй Украины “Одесса барилга архитектур”-ын академийг архитертурын чиглэлээр бакалаврын зэрэгтэй төгссөн гэнэ шүү.  Тэрбээр контакт линз болон нүүр будалтын хүчээр барби мэт харагддаг. Гэхдээ түүний будалтыг мэргэжлийн нүүр будагч хариуцдаг гэнэ.

Түүнийг 2007 оноос олны хараанд өртөж эхэлсэн гэхэд хилсдэхгүй.  2007 онд тэрбээр “Miss Diamond Crown of the World” гоо бүсгүйчүүдийн тэмцээнд оролцон тэргүүн титмийн эзэн болж байлаа.  Ямар нэг шалгуургүй, гоо сайхны мэс засал хийлгэсэн бүсгүй ч оролцож болдог гэдгээрээ онцлог тус тэмцээнд орон орны 300 гаруй гоо бүсгүйчүүд оролцсон байдаг.  300 гаруй бүсгүйчүүд дундаас өөрийн авьяас чадвар гоо үзэсгэлэнгээрээ эрхгүй ялгарч, тэргүүн титмийг хүртсэн бүсгүйн нэр алдар  алга урвуулах төдийд л олны анхаарлыг татаж эхэллээ.  Оросын хэвлэл мэдээлэлийн хэрэгслээр түүний эротик зураг, ярилцлагууд цацагдах болсон бөгөөд  тэрбээр өөрөө ч видео, зургийг вэб хуудастаа нийтлэх болсон  байдаг.  Улмаар түүний төрх байдал нь дэлхий нийтийн анхаарлыг татаж, “Амьд барби” гэх нэрээр олонд танигдаж эхэлсэн түүхтэй.

Ингэж л архетиктурч мэргэжилтэй бүсгүй “Хүн барби”, “бодит амьдрал дээрх барби”, “амьд барби” гэх зэргээр цоллуулах болсон байна.  

2013 онд бүсгүй өөрийн амьдралаас сэдэвлэсэн “Space Barbie” гэх бүтээлийг гаргаж байжээ. Олон нийт түүнийг мэс засал хийлгэж өнөөгийн галбираа олсон гэж үздэг.  Гэхдээ бүсгүй хиймэл хөхтэй гэдгээ хүлээн зөвшөөрдөг ч, өөр мэс засал хийлгээгүй хэмээдэг.

Мөн бэлхүүсээ нарийсгах зорилгоор хавиргаа авхуулсан гэх мэдээллийг үгүйсгэдэг билээ.

2014 оны гурван сарын байдлаар гэхэд түүний фэйсбүүк шүтэн бишрэгчдийн тоо аль хэдийнэ саяд тулж, твиттерт дагагчид нь 10 мянга болсон байлаа.

Түүний урын санд 100 гаруй дуу бий.  

Мөн “The Phase” гэх кинонд тоглосон бөгөөд уг кино долоон орны хэлээр гарчээ. Тэрбээр мөн хөгжмийн зохиолч, дуурийн дуучин. Валерия аль хэдийнэ хоёр ч цомгоо гаргачихсан сүйхээтэй нэгэн. Түүний цомгийн нэр нь “2013", “Sun in the Eyes”.  Мөн “Astral Travel Amatue” гэх ном бичсэн удаатай.

Хувийн амьдралынх нь тухай сонирхуулахад, мэдээж тэр гэрлэсэн. Түүний амьдралын ханиар сонгогдсон азтай эр бол багынх нь найз Украины бизнесмэн Дмитрий  Шкрабов юм. Мөн Валерия  цагаан хоолтон төдийгүй, шингэн хоолны дэглэм барьдаг ажээ.

Валерия Лукьянова   16 насандаа Украины Одесса руу шилжин, тэндээ 2014 оныг хүртэл  суурьшчээ.  Харин зүүн Украины байдал хурцдах үед бүсгүй нөхрийнхөө хамт Москвад ирж тэндээ амьдрах болсон гэнэ.