Байгаль орчин, уур амьсгалын өөрчлөлтийн талаарх асуудал манай улсад гэлтгүй дэлхий нийтийн анхаарлын төвд орсон. Уур амьсгалын өөрчлөлт, ногоон хөгжлийн асуудал идэвхтэй яригдаж буй энэ цаг үед олон улсын судлаачид байгаль орчны бохирдоос хамгаалах  гарц, шийдлийг эрэлхийлэн судалгааны ажлыг эрчимтэй хийж байна.

Харин манай улсад Монгол дээрх байгаль орчин, ногоон хөгжлийн талаар сурах бичиг, холбогдох судалгааны ном ховор байдаг ажээ. Тэгвэл манай улсад байгаль орчны талаарх нэгэн ном орчуулагдан гарчээ.

Тодруулбал, НЗД-ын Экологи, ногоон хөгжлийн асуудал хариуцсан орлогч дарга Т.Бат-Эрдэнэ санаачлан төсөл хэрэгжүүлэн  Норвегийн эрдэмтэн Жорген Рандерсийн “Даян дэлхийн тухай ирэх 40 жилийн таамаглал 2052” номыг орчуулуулсан байна.

Тэрбээр энэ тухай “Миний хувьд энэхүү номын зохиолчтой анх 2015 онд солонгос улсын Сөүл хотод ICLEI хурал дээр танилцсан юм. Тус хуралд дэлхийн ирээдүйн талаар илтгэл тавьсныг ихэд сонирхож, хожим уулзах бодолтой явлаа. Тэгтэл удалгүй Норвегийн Осло хотод ажлын шаардлагаар явах хэрэг гарч, улмаар номын зохиогчтой уулзан номыг нь Монгол хэл дээр орчуулахаар болсон юм.

Ингээд төслийн баг маань номыг жил гаруй хугацаанд орчуулсан. Бид өнөөдрийн улс орныхоо хөгжлийг шийдэхдээ эх дэлхийнхээ ирээдүйг харсан бодлого, шийдвэр, үйл хөдлөлөө төлөвлөх шаардлагатай байгаа тухай улс төрчид бодлого боловсруулагчид, судлаачид, оюутан залуус энэхүү номноо суралцах боломжтой” гэв.

Энэхүү ном нь 2012 онд анх Англи хэл дээр хэвлэгджээ. Хэвлэгдсэн цагаасаа хойш Герман, Солонгос, Япон, Итали, Хятад, Польш зэрэг хэл дээр нийт 100.000 гаруй хувь орчуулагдсан байна. Ийнхүү тус ном хамгийн сүүлд Монгол хэл дээр хэвлэгдэн уншигчдын гар дээр очоод байгаа ажээ.