ХЗДХ-ийн сайд Х.Нямбаатар БНХАУ-ын Эрээний хил нээгдэх тухай болон боомтуудын үйл ажиллагаатай холбоотой асуудлаар мэдээлэл хийж байна. 

Тэрбээр, Боомтын сэргэлтийн үндэсний зөвлөлийнхөн БНХАУ-ын ӨМӨЗО-ны дэд тэргүүлэгч, боомтын асуудал хариуцсан дарга тэргүүтэй хүмүүстэй өнөөдөр цахим уулзалт хийлээ. Уулзалтаар хоёр орны боомтын чиглэлээр баримтлах бодлогууд зэрэг олон асуудлаар санал солилцсон. 2021 оны 12-р сарын 19-нд батлагдсан Шинэ сэргэлтийн бодлогын Боомтын сэргэлтийн хүрээнд БНХАУ-ын Боомтын захиргаатай хамтарч ажиллах талаар нэг бүрчлэн харилцан санал солилцлоо. Энэ хүрээнд: 

• Төмөр замын хил холболтын асуудал, төмөр замын бүтээн байгуулалтын асуудлууд
• Гашуунсухайт, Ганцмод боомтын төмөр замын бүтээн байгуулалтын ажлыг үргэлжлүүлэх гүйцэтгэх талаар хоёр талын байр суурийг илэрхийллээ. 

2023 оны нэгдүгээр сард багтаан бүтээн байгуулалтын ажлыг санхүүжүүлж, гүйцэтгэх асуудлаар Чайна энержи-гийн холбогдох албаны хүмүүсийг Улаанбаатарт урих талаар санал солилцлоо. 

Мөн аюултай ачаа, тэсэрч дэлбэрэх бодисыг зөвхөн Замын-Үүд Эрээний боомтоор нэвтрүүлдэг. Өвөрмонголын талаас зорчигч олноор нэвтэрдэг боомтоор тэсэрч дэлбэрэх бодис тээвэрлэх нь эрсдэлтэй гэж үзсэн. Тиймээс Ханги-Мандалын боомтоор энэ чиглэлийн барааг тээвэрлэх хүсэлтээ Монгол Улсын Засгийн газраас тавьсан. Энэ саналыг судалж байна гэдгээ илэрхийлсэн.

Уулзалтаар яригдсан бас нэг чухал асуудал бол бэлтгэл ажлыг хангавал 2023 оны 1-р сарын 8-наас эхлэн зорчигч тээврийн боомтуудыг шат дараатай нээх шийдвэр гаргаснаа БНХАУ-ын тал мэдэгдлээ. Хоёр талын боомтын бэлтгэл ажил хангагдсан байдлаас шалтгаалж, 1-р сарын 8-наас эхлэн зорчигчийн боомтуудыг нээнэ. 

Эхний ээлжинд Эрээн-Замын-Үүд боомтын зорчигчийн хөдөлгөөнийг нээх чиглэлээр хамтарч ажиллая гэж ярилцлаа. Бэлтгэл хангасан бол 1-р сарын 8-нд зорчигчийн хөдөлгөөнийг нээхийг үгүйсгэхгүй. Үүний дараа Шивээхүрэн, Ханги-Мандал, Бичигтийн боомтуудаар зорчигчийн хөдөлгөөнийг нээх зэргээр үе шаттай ажиллана гэв. 

Гурван жилийн дараа зорчигчийн хөдөлгөөнийг нээх шийдвэр гарсан бөгөөд манай холбогдох байгууллагууд БНХАУ-ын талаас тавьсан шалгуурын дагуу бэлтгэл хангасан гэж итгэж байна.