Дорнод аймагт энэ сарын эхээр  долоон настай, хоёрдугаар ангийн сурагч хүүг эцгийнх нь нууц амраг болох С гэгч эмэгтэй  хүн хөлслөн амийг нь бүрэлгүүлсэн аймшигт хэрэг гарсан талаар бид өмнө нь мэдээлсэн. Тэгвэл тус хэргийн талаар  цагдаагийн газраас мэдээлэл хийлээ. Цагдаагийн Ерөнхий Газрын Хэвлэл мэдээллийн төвийн дарга, цагдаагийн дэд хурандаа Б.Баатархүү “2016 оны есдүгээр сарын 6-ны өдрийн 16:34 цагт Дорнод аймгийн Хэрлэн суманд суух долоон настай Т цахилгаанд цохиулсан байдалтайгаар  нас барсан байна гэх мэдээлэл  цагдаагийн байгууллагад ирсэн. Аймгийн цагдаагийн газраас хэргийн газарт очиж,  ажиллагаа явуулсан. Уг хэрэгт урьдчилсан байдлаар хохирогчийн эцэг Ц-тэй хувийн дотно харилцаатай 1992 онд төрсөн С гэгч эмэгтэйг шалгаж байна. Иргэн С гэгч нь 1998 онд төрсөн Б гэгчид захиалга өгч хохирогчийн аминд  хүрсэн байж болзошгүй. Мөрдөн байцаалтын ажиллагаа явагдаж байгаа учраас илүү дэлгэрэнгүй мэдээлэл өгөх боломжгүй" гэсэн юм. Тус хэрэгт сэжиглэгдэж буй Б өмнө нь энэ онд Эрүүгийн хуулийн 145, 145.2-т зааснаар хоёр жилийн ял шийтгүүлж, насанд хүрээгүй учраас ял хойшилсон байжээ. Мөн Эрүүгийн хуулийн 91.2.11-т зааснаар сэжигтнүүдэд таслан сэргийлэх арга хэмжээ авч мөрдөн байцаалтын ажиллагаа явуулж байгаа юм байна

 

Н.Батзаяа