Сангийн сайд асан С.Баярцогт өнөөдөр Швейцарийн прокурорын байгууллагаас хэргийг нь цагаатгасан талаар мэдээлэл хийлээ.

Тэрээр "2016 оноос хойш “Оюутолгой”-н гэрээтэй холбогдуулан миний биед эрүүгийн хэрэг үүсгэж, маш удаан шалгалт хийсэн. Зургаан жилийн турш шалгагдлаа. Зөвхөн Монголд ч бус тодорхой улс төрчдийн нөлөөтэйгээр, олон нийтийн байгууллагын нэрээр Швейцарийн холбооны улсад ч хэрэг үүсгэн шалгасан. Швейцарийн холбооны улс эрх зүйн харилцан туслалцах гэрээний хүрээнд Монгол Улс, Хонгконг, Австралийн холбооны улсын хууль хүчний байгууллагуудтай хамтран ажиллаж, энэ хэргийг шалгасан юм билээ. 2022 оны зургаадугаар сарын 13-нд Нийслэлийн прокурорын газраас надад үүсгэсэн хэргүүдийг хэрэгсэхгүй болгосон. Цагаатсандаа баяртай байна. Монголын хууль хүчний байгууллагууд хүн биш хууль засагладаг эрин үе гэдгийг харуулж чадлаа. Үүнтэй адил цагаатгасан тогтоолыг Швейцарийн холбооны улсын Холбооны прокурорын газраас 2022 оны наймдугаар сарын 24-нд ирүүлсэн. Гэтэл сүүлийн үед зохион байгуулалттайгаар энэ хэргийг эргэн сөхөж байна. Тиймээс Нийслэлийн прокурорын газрын Тамгын газрын даргад Швейцарийн холбооны улсын Холбооны прокурорын тогтоолыг хүргүүлж байна" гэв.