“Тулгуурт гүүрэн байгууламж бүхий багтаамж ихтэй шинэ төрлийн тээврийн үйлчилгээг нэвтрүүлэх төсөл” буюу LRT төслийг 2022 онд хэрэгжүүлэхээр Нийслэлийн ИТХ-аар баталсан. Гэвч төслийн санхүүжилт, баталгаа 2023 оны төсөвт суугаагүй гэдгийг Эдийн засгийн хөгжлийн сайд Ч.Хүрэлбаатар хэллээ. Тэрбээр “Аан тийм, энэ төсөв дээр LRT-ын мөнгө, баталгаа энэ тэр гэж юу ч суугаагүй гэдгийг хэлэхээ мартчихаж” хэмээсэн юм.  

Нийслэлээс энэхүү төслийг өнгөрсөн дөрөвдүгээр сард Төсвийн байнгын хороонд оруулж ирсэн ч тус тогтоолын байнгын хороогоор дэмжээгүй юм. УИХ-ын гишүүн, Төсвийн байнгын хорооны дарга Ч.Хүрэлбаатар тухайн үед "Засгийн газрын өөрийн өргөн мэдүүлсэн төсөлд байгаа зээлийн баталгаа гаргуулагч нь нэг компани байгаа. Тэр компани нь регистрийн дугаараа аваагүйн дээрээс нь 3 жил ашигтай ажилласан байх ёстой гэсэн өрийн удирдлагын хуультай зөрчилдөж байна. 2.8 тэрбум ам.долларын өртөгтэй LRT төсөл болон Тавантолгойн цахилгаан станц дээр 565 сая ам.долларын баталгаа гаргах асуудлуудыг нийлүүлээд үзэхээр 3.4 орчим тэрбум долларыг нэмэхээр Монгол Улсын өрийн бодлоготой зөрчилдөж байна. Миний хувьд энэ асуудлыг ярьсан. Улмаар төсвийн байнгын хороо дээр энэ асуудал хэлэлцэгдээгүй. Улаанбаатар хотод түгжрэлийн асуудлыг шийдэх өөр хувилбарууд гарч ирээсэй гэж хүсэж байна. Монгол Улсад хийгдэж буй том төслүүд хуулийн дагуу хийгдэх ёстой. Миний хувьд хууль дээдлэх зарчмыг хатуу баримталдаг" хэмээн мэдэгдэж байсан юм.