Замын цагдаагийн гүүрэн гарц буюу Олимпын гудамж, Их Монгол Улсын гудамжийг холбосон, дөрвөн эгнээтэй, 477 метр урт, төмөр бетон гүүрийн хөдөлгөөнийг 2019 оны есдүгээр сард нээсэн боловч өнөөдрийг хүртэл явган хүний замгүй байна. Цар тахлын улмаас үүдэн удаашраад байсан гүүрийн ажлыг энэ жилийн наадмаас өмнө дуусгахаар төлөвлөсөн гэдгийг нийслэлийн Засаг даргын хэвлэлийн төлөөлөгч Н.Сугар өнгөрсөн гуравдугаар сард мэдээлж байлаа. Гэвч явган хүний гүүр барих ажил одоо ч үргэлжилсээр л байна.

Явган хүний гүүрний 42 урт метр дам нурууны угсралтын ажлыг гүйцэтгэж байна. Үүнтэй холбоотойгоор энэ сарын 20-ны 23:00 цагаас 22-ны 06:00 цаг хүртэл Нарны замыг хэсэгчлэн хааж, тээврийн хэрэгслийн хөдөлгөөнийг хязгаарлалаа.

Явган хүний гүүр ашиглалтад орсноор явган болон тэргэнцэртэй иргэд зорчих боломжтой болох бөгөөд гүүрний урт 295 метр ажээ.