Өсвөр үеийнхнийг эрүүл аж төрөх дадалд суралцуулах тогтвортой тогтолцоо байгуулах төслийн үр дүнг өнөөдөр танилцууллаа. Төсөл танилцуулах үйл ажиллагаанд НЭМГ-ын хүүхэд өсвөр үеийнхний эрүүл мэнд хариуцсан мэргэжилтэн Б.Бадамханд, “Жайка” олон улсын хамтын нийгэмлэгийн Монгол дахь суурин төлөөлөгчийн газрын орлогч  дарга Савада Хироми, Японы Жичи анагаах ухааны их сургуулийн багш Такамүра Хисако нар оролцлоо.

 

Энэхүү төсөл нь өсвөр үеийнхнийг эрүүл аж төрөх дадалд суралцуулахад чиглэсэн тогтвортой системийг байгуулж, бэхжүүлэх зорилготой аж. Төслийн хүрээнд гэр хорооллын хүүхдүүд хамгийн ихээр оршин суудаг Сүхбаатар дүүргийн өсвөр үеийнхэн болон эцэг, эхчүүдийн дунд асуумж судалгаа явуулсан байна. Энэхүү судалгаанд 728 хүүхэд, 731 эцэг, эх оролцжээ. Тодруулбал, ерөнхий боловсролын сургуулийн VII, VIII, IX, X дугаар ангийн сурагчид судалгаанд хамрагдсан байна.

 

Энэ үеэр Японы Жичи анагаах ухааны их сургуулийн багш Такамүра Хисако “Монгол Улсын хэмжээнд өсвөр үеийнхний дунд өсвөр насны охидын хүсээгүй жирэмслэлт, бэлгийн замын халдварт өвчин нэмэгдэж байна гэсэн асуудал байсан учраас өсвөр үеийнхэнд эрүүл мэндийн боловсрол олгох шинэ аргыг Монголд нэвтрүүлэхээр ажиллаж байна. Бид өсвөр үеийхэн төвтэй “Үе тэнгийн зөвлөхийн үйл ажиллагаа”-г өргөжүүлэн хөгжүүлэх юм. Өөрөөр хэлбэл, хүүхдүүд дундаас зөвлөгч бэлтгэнэ. Судалгааны явцад ч гэсэн хүүхдүүд эцэг, эхээс илүү найз нөхдөөсөө нөхөн үржихүйн талаарх мэдээллийг авах хүсэлтэй байдаг нь тогтоогдсон” гэв.

 

Үе тэнгийн зөвлөгч бэлтгэх сургалт маргааш эхлэх юм байна. Ингэхдээ тухайн хүүхэд өөрөө хүсвэл энэхүү сургалтад сууж, зөвлөгч болох боломжтой ажээ. Ингээд өсвөр үеийнхний дунд хийгдсэн судалгааны үр дүнг хүргэе.