Архангай аймгийн Хангай сумын Тэрх баг, Хайрханы эхийн хөндий Цагаан чулуутын өвөлжөөний баруун талд Их Британийн иргэн 53 настай Стивен Эдвард Нейш бусдын гарт харамсалтайгаар амиа алдсан хэрэг өнгөрсөн сарын 31-нд гарсан билээ. Стивен Эдвард Нейш гэх иргэнийг хэвлийн тус газарт нь хоёр удаа шовх үзүүртэй зүйлээр нэвт хатгаж, амийг нь хөнөөсөн болохыг Шүүх шинжилгээний албаныхан урьдчилсан байдлаар тогтоогоод байгаа юм.

Дээрх гэмтлийн улмаас талийгаач их хэмжээний цус алдаж, 500 орчим метр алхаж яваад амиа алдсан гэдгийг албаны эх сурвалж хэлж байна. Түүнийг амиа алдсан байхыг анх тус багийн оршин суугч Доржпалам олж харсан бөгөөд багийнхаа Засаг дарга Б.Олзвойд дуулгажээ. Улмаар Засаг дарга Олзвой сумын цагдаа Н.Сандуйд хэлж, хэргийн мөрдөн байцаах ажиллагаа эхэлжээ.

Мөрдөн байцаах ажиллагааны үеэр сэжигтэн Б.Гантулгыг баривчилжээ. Учир нь хэргийн мөрдлөгийн үеэр түүнтэй холбоотой хэд хэдэн сэжигтэй тохиолдол илэрсэн аж. Ингээд мөрдөн байцаалтын үеэр сэжигтэн Б.Гантулга “Стивен Эдвард Нейшийг морь аргамждаг гадсаар хөнөөсөн” хэмээн хүлээн зөвшөөрчээ. Мөн талийгаачийн өмсөж явсан хантаазыг авч, 200 гаруй мянган төгрөг, 150 ам.долларыг авснаа ч хүлээсэн гэнэ.