Цагаанчулуут баг, Сансар худалдааны төвийн ард баригдаж буй төрийн албан хаагчдын 75 айлын хоёр блок орон сууц энэ оны дөрөвдүгээр улиралд ашиглалтад орно гэх мэдээллийг гүйцэтгэгч “Хэрлэн зураглал” ХХК өглөө. Тус орон сууцны нэг метр квадрат талбайн үнийг нэг сая 350 мянган төгрөгөөр тогтож, энэ оны гуравдугаар улиралд хүлээлгэж өгөхөөр гэрээнд тусгасан.

Цар тахлын улмаас хил гааль хаалттай байсан, барилгын матариалын үнэ хэд дахин өссөн зэрэг шалтгааны улмаас ийн хугацаа хойшлоод байгаа юм. 2021 оны гуравдугаар сард талуудын үзэглэсэн гэрээнд “Барилгын үндсэн материалын үнэ өсөх, эсвэл байгалийн давагдашгүй хүчин зүйл болбол нэг метр квадрат талбайн үнэд өөрчлөлт оруулна” гэх утга бүхий заалт бий. Уг заалтын дагуу “Хэрлэн зураглал” ХХК аймгийн ЗДТГ-т нэг метр квадрат талбайн үнийг эргэж харах саналаа ирүүлсний дагуу талууд уулзаж, зөвшилцөлд хүрсэн байна.

Ингэхдээ гүйцэтгэгч “Хэрлэн зураглал” ХХК нийгмийн хариуцлагын хүрээнд үнэ өссөнтэй холбоотой бүхий л эрсдлийг үүрч анх гэрээнд тусгасан нэг метр квадрат талбайн үнэд өөрчлөлт оруулахгүйгээр барилгыг хүлээлгэж өгөхөөр болжээ. Харин аймгийн ЗДТГ төрийн байгууллагын зүгээс хүндрэл чирэгдэлгүй ажил гүйцэтгэх боломжоор хангах юм. Уг орон сууцад эмнэлэг, ГХБХБГ, аймгийн ЗДТГ-ын албан хаагчид хамрагдах юм.