Засаглал эрх зүйн шинэтгэлийн хорооны өнөөдрийн хуралдаанаар хороодын бүтэц зохион байгуулалтад өөрчлөлт оруулах асуудлыг хэлэлцэв. Энэ талаарх танилцуулгыг Нийслэлийн Засаг даргын Тамгын газрын Төрийн захиргааны удирдлагын хэлтсийн дарга Ү.Ганболд хийлээ. Өнөөдрийн байдлаар нийслэлийн хэмжээнд нийт 171 хороо бий бөгөөд нэг хороонд дунджаар 23.000 орчим иргэн амьдарч байна. Харин нэг хороо 8-10 мянган иргэнд хүрч ажиллах боломжтойг хэлтсийн дарга Ү.Ганболд тайлбарласан юм. Тиймээс Баянгол, Хан-Уул, Баянзүрх болон Чингэлтэй дүүргийн нийт 36 хороог хувааж, шинээр 33 хороо байгуулах талаар тогтоолын төслийг боловсруулжээ. 

Хэлэлцүүлгийн үеэр Төлөөлөгч П.Ганзориг Хан-Уул дүүргийн 11 дүгээр хороо буюу Зайсан орчимд шинэ хороо байгуулах шалтгааныг тодруулав. Ү.Ганболд үүнд “Хан-Уул дүүргийн 4, 11, 16 дугаар хороог хуваах, өөрчлөн зохион байгуулах саналыг ирүүлсэн бөгөөд хүн амын нягтаршил, газар нутгийн хэмжээг харгалзан дээрх саналыг боловсруулсан” гэж тайлбарлалаа. Сүүлийн жилүүдэд дээрх гурван хороонд барилгажилт ихээр явагдаж, хүн амын тоо эрс өссөн. Тиймээс засаг захиргааны анхан шатны нэгж хороодыг хувааж, төрийн үйлчилгээг иргэд түргэн шуурхай, чирэгдэлгүй авах боломжийг бий болгох, улмаар чанар хүртээмжид ахиц гаргах зорилготой аж. Энэхүү асуудлыг Нийслэлийн ИТХ-ын ээлжит чуулганаар хэлэлцэнэ.