Хөдөө орон нутагт малын гоц халдварт өвчин гарсны улмаас пост бүр хяналт шалгалт хийж байгаа билээ. Тэгвэл Дундговь аймгийн Сайнцагаан сумын Үйзэн багийн малчин хонины гоц халдварт цэцэг өвчнөөр өвчилж тусгайлан ялгасан хониноосоо нядалж аймгийн төврүү оруулж байгаад хяналтын постныхонд баригдсан байна.

Шалгалтынхан малчинд Монгол Улсын Малын удмын сан, эрүүл мэндийг хамгаалах тухай хуулийн 14.1.3 хорио цээрийн дэглэм биелүүлэх , уг махыг тээвэрлэсэн жолооч нь Мал хулгайлах гэмт хэрэгтэй тэмцэх, урьдчилан сэргийлэх тухай хуулийн 8.2-т заасан мал, махыг ариун цэвэр гарал үүслийн гэрчилээтэй тээвэрлэх гэсэн заалтуудыг зөрчсөн тул торгуулийн арга хэмжээ авчээ.

Түүнчлэн тус багийн Бурхантад устгалын нүх ухаж, таван хонины махыг устган ариутгал халдваргүйжүүлэлт хийхэд хяналт тавин ажиллаж малын эмчээр ахлуулсан устгалын ажлын хэсгээр акт үйлдлүүлэн, баталгаажуулж ажилласан байна.

Дээрхи зөрчил дутагдал гарч байгаатай холбогдуулан малын гоц халдварт хонины цэцэг өвчнөөс урьдчилан сэргийлэх вакцинд хамрагдсан хонийг эрүүл бүсээс вакцин хийлгэсэн өдрөөс хойшхи 21 хоногийн дараа буюу голомтын бүсээс өвчин тусаагүй эрүүл хонины махыг хорио цээрийн дэглэм цуцлагдсанаас хойш нийтийн хэрэгцээнд худалдан борлуулахыг зөвлөж байна.