Хоёр болон гурван настай хүүхдүүдийг цэцэрлэгт хамруулах эсэх талаар БШУ-ны дэд сайд Г.Ганбаяр мэдээлэл өглөө. Тэрээр “Энэ жил цэцэрлэгт хамрагдах хүүхдүүдэд тодорхой насны хязгаар тавьсан. Энэ нь эцэг эхчүүдэд болон хүүхдүүдэд хүндэртэй байгаа. Тиймээс сүүлийн хоёр сар энэ асуудлыг шийдвэрлэхээр ажиллаж байна. Гэхдээ БШУЯ-наас хамаарч шийдвэр гаргаж чадахгүй байна. Учир нь 2-3 настай хүүхдүүд Ковид19 халдварын Дельта халдвар авсан тохиолдолд гүйлгэх, суулгах шинж тэмдэг илэрнэ гэж Эрдэмтийн зөвлөл үзэж байгаа. Боловсролын байгууллагууд бүлгийн тоо, анги дүүргэлт дээрээ хязгаарлалт тавиад энэ насны хүүхдүүдийг цэцэрлэгт хамруулах боломжтой гэсэн санал тавьж байгаа. Гэхдээ бид хүүхдүүдийг цэцэрлэгт ав, битгий ав гэж шууд шийдвэрлэж чадахгүй байна. Юутай ч 2-3 настай хүүхдүүдийг цэцэрлэгт авах бэлтгэл ажлаа хангачихсан. Эцсийг шийдвэрийг УОК гаргана" гэлээ.