Хангай нурууны оргилд гарах зорилгоор найзынхаа хамт Монголд ирсэн Их Британийн уулчин бусдад дээрэмдүүлж, амиа алдсан тухай бид өмнө нь мэдээлсэн. Тэгвэл уг хэрэгт хоёр иргэнийг сэжигтнээр татан, шалгаж байгаа тухай өнөөдөр ЦЕГ-аас мэдээллээ.

ЦЕГ-ын Хэвлэл мэдээллийн төвийн дарга, цагдаагийн хошууч Б.Баатархүү “Архангай аймгийн Хангай сумын Тэрх баг “Хандрагт” гэх газарт Англи улсын иргэн 53 настай Стивен Нэйш гэгч амиа алдсан талаарх мэдээлэл энэ сарын 01-ний 02.40 цагт Цагдаагийн байгууллагад бүртгэгдсэн. Тус хэргийг Улсын мөрдөн байцаах газрын Онц хүнд гэмт хэрэгтэй тэмцэх тасаг, Архангай аймгийн ЦЕГ-тай хамтран ажлын хэсэг гарган, хэргийн газар дээр ажиллаж байгаа. Одоогоор энэ хэрэгт холбогдуулан хоёр иргэнийг сэжигтнээр татан, шалгаж байна” гэв